बहादुरगढ़ (हरियाणा), 0५ जुलाई (हि.स.)। लरेन्स बिश्नोई गिरोहका दुई शूटर आज बिहान यहाँ पुलिससँग भएको भिडन्तमा मारिएका छन्। उनीहरूको परिचय प्रवेश र हिमांशु का रूपमा भएको छ। दुवै जना हाँसीमा जिम सञ्चालक कपिलको हत्यामा संलग्न रहेको पुष्टि भएको छ। यस खबरको पुष्टि स्पेशल टास्क फोर्स (एसटीएफ) का पुलिस अधीक्षक विक्रान्त भूषणले गरेका हुन्।
पुलिस अधीक्षक भूषणका अनुसार, गत महिना हाँसीमा जिम सञ्चालक कपिलको दुई अज्ञात व्यक्तिले गोली हानी हत्या गरेका थिए। जाँचका क्रममा उक्त हत्याकाण्डमा लरेन्स बिश्नोई गिरोहका शूटर प्रवेश र हिमांशुको संलग्नता खुलेको थियो।
उनले भने, “आज यी दुवै वाञ्छित शूटरको सम्बन्धमा काउन्टर इन्टेलिजेन्स दिल्ली स्पेशल सेलका युनिट इन्चार्ज मञ्जीतलाई गोप्य सूचना प्राप्त भएको थियो। सूचनाअनुसार उनीहरू हतियार र गोलाबारुदसहित अर्को आपराधिक घटना गराउने योजनामा थिए।”
भूषणका अनुसार, पुलिस टोलीले सबैभन्दा पहिले उक्त क्षेत्रलाई घेरा हाल्यो। त्यसपछि दुवैलाई पक्राउ गर्न पुलिस अगाडि बढ्दा प्रवेश र हिमांशुले पुलिसमाथि गोली चलाउन थाले। आत्मरक्षाका लागि पुलिस टोलीले पनि जवाफी फायरिङ गर्नुपरेको उनले बताए।
भिडन्तका क्रममा एक जना पुलिस जवानको खुट्टामा गोली लागेको छ भने अन्य चार जना पुलिस अधिकारीको बुलेटप्रुफ ज्याकेटमा गोली लागेको बताइएको छ। भिडन्तमा दुवै शूटर पनि घाइते भएका थिए। उनीहरूलाई तत्काल अस्पताल लगिए पनि चिकित्सकहरूले मृत घोषणा गरे। घाइते पुलिस जवानलाई थप उपचारका लागि सुपर स्पेशालिटी अस्पतालमा रेफर गरिएको छ।
---------------
हिन्दुस्थान समाचार / भवानी थामी
05 Jul 2026
