बेलगावी, 06 जुलाई (हि.स.)। राष्ट्रिय स्वयंसेवक संघ (आरएसएस) का सरसंघचालक मोहन भागवत आज साँझ कर्नाटकको बेलगावी पुग्नेछन्। उनको आगमनसँगै संघको वार्षिक अखिल भारतीय प्रान्त प्रचारक बैठकको तयारी अन्तिम चरणमा पुग्ने छ। 10 देखि 12 जुलाईसम्म हुने यस महत्वपूर्ण बैठकमा संघबाट प्रेरित विभिन्न संगठनहरूका शीर्ष पदाधिकारी सहित देशभरिका वरिष्ठ प्रचारकहरुको सहभागिता रहनेछ। बैठकमा सङ्गठन विस्तार, शताब्दी वर्षका कार्यक्रमहरू र विभिन्न समसामयिक राष्ट्रिय विषयहरूमा विस्तृत छलफल हुनेछ।

संघका अखिल भारतीय प्रचार प्रमुख सुनील अम्बेकरले जारी गरेको जानकारी अनुसार, यो बैठक युगाब्द 5128 एवं विक्रम संवत् 2083 को ज्येष्ठ (उत्तर भारतमा आषाढ़) कृष्ण दशमी, एकादशी र द्वादशी अर्थात 10, 11 र 12 जुलाईमा आयोजित हुनेछ। संगठनात्मक दृष्टिले यसलाई संघको वर्षको सबैभन्दा महत्वपूर्ण बैठकहरूमध्ये एक मानिन्छ।

बैठकमा संघका सबै 11 वटै क्षेत्र र 46 प्रान्तहरूका प्रान्त प्रचारक, सह प्रान्त प्रचारक, क्षेत्र प्रचारक र सह–क्षेत्र प्रचारकको सहभागिता रहनेछ। यस बाहेक संघबाट प्रेरित 32 विभिन्न संगठनहरूका अखिल भारतीय संगठन मन्त्रीहरू पनि सहभागी हुनेछन्। यस अवधि संगठनात्मक गतिविधि, सेवा कार्य र विस्तार अभियानको विस्तृत समीक्षा गरिनेछ।

मार्चमा भएको अखिल भारतीय प्रतिनिधि सभापछि बैठकको मुख्य विषय अप्रेल, मई र जून महिनामा देशभरि सञ्चालित संघका विभिन्न प्रशिक्षण वर्गहरूको समीक्षा हुनेछ। साथै शाखा विस्तार अभियानको प्रगति, सांगठनिक कार्यप्रणाली तथा आगामी योजनाका बारेमा विस्तृत छलफल हुनेछ।

बैठकमा राष्ट्रिय स्वंयसेवक संघको शताब्दी वर्ष अन्तर्गत सञ्चालित कार्यक्रमहरूको समीक्षा पनि हुनेछ। देशभरि शाखा विस्तारको वर्तमान अवस्थाको मूल्याङ्कन गरी अधिकतम शाखा विस्तारका लागि आगामी रणनीतिमा विचार गरिनेछ। साथै सन् 2026 को प्रशिक्षण वर्गहरूको प्रतिवेदन, त्यसबाट प्राप्त अनुभव र भावी कार्ययोजनाका बारेमा पनि छलफल हुनेछ।

यस बैठकमा संघले आगामी विजयादशमी (20 अक्टोबर 2026 ) सम्म शताब्दी वर्ष अन्तर्गत आयोजना हुने बाँकी कार्यक्रमहरूको रूपरेखा पनि तय गर्नेछ। विभिन्न प्रदेशमा भइरहेका कार्यक्रम र जनसम्पर्क अभियानको समीक्षा गरी आगामी कार्यक्रमहरूलाई अन्तिम रूप दिइनेछ।

बैठकमा सांगठनिक विषयहरू बाहेक वर्तमान राष्ट्रिय अवस्था, जनगणना लगायत समसामयिक विषयमा पनि छलफल हुनेछ। देशभरिका प्रचारकहरुले आ–आफ्नो क्षेत्रका अनुभव आदान-प्रदान गर्नेछन् जसको आधारमा संगठनको भावी रणनीति तय गरिनेछ।

यस महत्वपूर्ण बैठकमा सरसंघचालक मोहन भागवत, सरकार्यवाह दत्तात्रेय होसाबले, सहायक सरकार्यवाह कृष्ण गोपाल, सीआर मुकुन्द, अरुण कुमार, रामदत्त चक्रधर, आलोक कुमार र संघका अखिल भारतीय कार्य विभागका प्रमुख अतुल लिमये र कार्यकारिणीका अन्य वरिष्ठ सदस्यहरू पनि सहभागी हुनेछन्।

हिन्दुस्थान समाचार / भवानी थामी