गान्तोक, 20 अगस्त (हि.स.)। सिक्किम लेप्चा एसोसिएसनले राज्यमा पर्यटनसम्बन्धी अनुमतिका लागि सरकारले अघि सारेको सिङ्गल विन्डो अनलाइन प्रणालीको स्वागत गरेको छ।

संघका अध्यक्ष छेवाङ नर्बु लेप्चाले बिहीबार जारी गरेको विज्ञप्तिमा सिङ्गल विन्डो प्रणाली पर्यटन सेवाहरूलाई सरल, पारदर्शी र सहज बनाउने दिशामा सरकारको प्रगतिशील पहल भएको बताएका छन्। यस प्रणालीले अनावश्यक ढिलाइ कम गर्नुका साथै पर्यटक, ट्राभल एजेन्सी तथा पर्यटन क्षेत्रसँग सम्बन्धित अन्य सरोकारवालाका लागि अनुमति प्रक्रिया सहज बनाउने एसोसिएसनले विश्वास व्यक्त गरेको छ।

संघले प्रस्तावित सिङ्गल विन्डो पर्यटन अनुमति प्रणालीबारे मनन केन्द्रमा आयोजित परामर्श बैठकको पनि प्रशंसा गरेको छ। बैठकमार्फत प्रणालीको उद्देश्य र आवश्यकताबारे स्पष्ट जानकारी प्राप्त भएको तथा पर्यटन एवं नागरिक उड्डयन विभागले विद्यमान अनुमति प्रक्रियालाई सरल बनाउने, कार्यालयहरूबीच समन्वय सुधार गर्ने र समग्र प्रणालीलाई थप पारदर्शी तथा सुविधाजनक बनाउने विषयमा जानकारी गराएको संघले जनाएको छ।

सिक्किमको अर्थतन्त्रको महत्वपूर्ण आधार पर्यटन रहेको उल्लेख गर्दै संघले यस क्षेत्रबाट ट्राभल सञ्चालक, चालक, गाइड, होमस्टे सञ्चालक, होटल तथा साना व्यवसायीसहित हजारौँ स्थानीयले जीविकोपार्जन गरिरहेको जनाएको छ। त्यसैले स्थानीय पर्यटन सरोकारवालाको हित संरक्षण गर्दै प्रणालीलाई थप प्रभावकारी बनाउने पहल स्वागतयोग्य रहेको संघको भनाइ छ।

संघले डिजिटल सेवाको प्रयोग बढाउँदा सम्बन्धित कार्यालयहरूबीच समन्वय सुधार हुनुका साथै थप व्यवस्थित र पारदर्शी प्रणाली निर्माणमा सहयोग पुग्ने जनाएको छ। यसले सिक्किम आउने पर्यटकको अनुभव सुधार गर्नुका साथै राज्यको पर्यटन गन्तव्यका रूपमा छवि अझ बलियो बनाउन योगदान पुर्‍याउने विश्वास व्यक्त गरिएको छ।

संघले नयाँ प्रणाली सरल, पहुँचयोग्य र स्थानीय पर्यटन सरोकारवालाका लागि लाभदायक हुने गरी कार्यान्वयन गर्न तथा प्रारम्भिक चरणमा पर्याप्त जनचेतना र आवश्यक सहयोग उपलब्ध गराउन आग्रह गरेको छ। साथै, संघले उक्त पहलप्रति आफ्नो समर्थन जनाउँदै यसको शीघ्र तथा प्रभावकारी कार्यान्वयनको अपेक्षा रहेको बताएको छ।

हिन्दुस्थान समाचार / बिशाल