अयोध्या, २१ अगस्त (हि.स.)। श्रीराम जन्मभूमि निर्माण समितिको बैठकको दोस्रो दिन शुक्रबार श्रीराम मन्दिर निर्माण कार्यबारे नृपेन्द्र मिश्रले सर्किट हाउसमा पत्रकारहरूलाई प्रगतिको जानकारी दिए। उनले अयोध्यामा भगवान् श्रीरामको भव्य मन्दिर निर्माण हुनु करोडौँ श्रद्धालुको सपनाको साकार रूप भएको बताए।
श्रीराम मन्दिर ट्रस्टका पूर्व महासचिव चम्पत रायले बिहीबार जारी गरेको पत्रमा आफ्नो नाम उल्लेख भएको विषयमा सोधिएको प्रश्नमा मिश्रले आफूले उक्त पत्र नै नदेखेको बताए। उनले भने, “मैले पत्र देखेको छैन र तपाईंहरू विवाद गराउन चाहनुहुन्छ।”
मन्दिर निर्माणमा केन्द्र वा राज्य सरकारको रकम प्रयोग नभएको र ट्रस्टले संकलन गरेको रकमबाट निर्माण कार्य भइरहेको उनले बताए।
उनका अनुसार, तय गरिएका करिब ७० वटा निर्माण कार्यमध्ये लगभग ६० वटा काम पूरा भइसकेका छन्। पूरा भएका निर्माण कार्यहरू श्रीराम जन्मभूमि तीर्थ क्षेत्र ट्रस्टलाई हस्तान्तरण गरिएको र अब यसको मर्मतसम्भार ट्रस्टले गर्ने उनले बताए।
परिसरमा वर्षायाममा हुने जलजमावको समस्या समाधान गर्न सिवेज तथा ड्रेनेज प्रणालीलाई मुख्य नालासँग जोड्ने काम गरिने उनले जानकारी दिए।
नृपेन्द्र मिश्रले संग्रहालय, अडिटोरियम तथा ट्रस्ट कार्यालयको निर्माणमा अहिले विशेष ध्यान दिइरहेको बताए। संग्रहालयको ग्यालरी नम्बर-७ मा करिब ५ करोड रुपीयाँ खर्च हुने उनले जानकारी दिए। त्यहाँ प्रवेश शुल्क लगाउने वा नलगाउने निर्णय ट्रस्टले गर्ने उनले बताए।
राम मन्दिर ट्रस्टका सीईओ नियुक्तिका लागि भइरहेको अन्तर्वार्तासम्बन्धी प्रश्नमा मिश्रले आफू उक्त प्रक्रियामा सहभागी नभएको र यसबारे आफूलाई जानकारी नभएको स्पष्ट पारे।
हिन्दुस्थान समाचार / भवानी थामी
