गान्तोक, ३१ अगस्त (हि.स.)। नेपालमा आएको विनाशकारी बाढी तथा प्राकृतिक विपत्तिबाट प्रभावित नागरिकप्रति ऐक्यबद्धता जनाउँदै सिक्किमले राहत तथा स्वास्थ्य सहायता उपलब्ध गराउन पहल गरेको छ। यसअन्तर्गत प्रभावितहरूका लागि आवश्यक राहत सामग्री तथा चिकित्सा सहायता नेपाल पठाउन लागिएको हो।

यस मानवीय पहललाई अघि बढाउँदै मुख्यमन्त्री प्रेमसिंह तामाङले सोमवार बिहान ‘सिक्किम फर नेपाल’ अभियानअन्तर्गत सत्तारुढ सिक्किम क्रान्तिकारी मोर्चा (एसकेएम) को एक समर्पित टोलीलाई राहत सामग्री तथा चिकित्सा सहायता लिएर नेपालतर्फ प्रस्थान गराएका छन्।

यस पहलले आपसी करुणा, मानवता र भ्रातृत्वको भावनालाई प्रतिबिम्बित गरेको मुख्यमन्त्रीले सामाजिक सञ्जाल पोस्टमा उल्लेख गरेका छन्। उनले विपत्तिको समयमा सबै एकजुट भएर कठिन परिस्थितिको सामना गरिरहेका मानिसहरूलाई सहयोगको हात बढाउनुपर्नेमा जोड दिएका छन्।

मुख्यमन्त्रीले नेपालमा आफ्ना प्रियजन गुमाएका परिवारहरूप्रति समवेदना व्यक्त गरेका छन्। उनले विपत्तिबाट प्रभावित तथा पीडित नागरिकप्रति ऐक्यबद्धता जनाउँदै नेपालले पुनःस्थापना र पुनर्निर्माणको कठिन यात्रा शुरु गरिरहेका बेला सिक्किम उनीहरूको साथमा रहेको बताएका छन्।

हिन्दुस्थान समाचार / बिशाल