बागपत, १३ सेप्टेम्बर (हि.स.)। जिल्लामा लागुऔषध विरुद्ध सञ्चालन भइरहेको अभियान अन्तर्गत पुलिसले दुई छुट्टा-छुट्टै घटनामा ठूलो सफलता हासिल गरेको छ। एकातिर बड़ौत क्षेत्रमा पुलिसले आई–२० कारबाट स्म्याक जफत गरी एक तस्करलाई पक्राउ गरेको छ भने अर्कोतर्फ कोतवाली पुलिसले एक युवकलाई अवैध गाँजा सहित पक्राउ गरेको छ। जफत गरिएको लागुऔषधको मूल्य लाखौँ रुपियाँ रहेको बताइएको छ।
बड़ौत पुलिस पूर्वी यमुना नहरको किनारमा गस्ती गरिरहेको थियो। यसै क्रममा दिल्लीबाट आइरहेको आई–२० कारलाई रोक्ने प्रयास गरियो। तर चालकले भाग्ने प्रयास गरे। पुलिसले घेराबन्दी गरी कारलाई रोक्यो। तलासीका क्रममा ड्यासबोर्डमा लुकाएर राखिएको ११६ प्याकेट स्म्याक जफत भयो। यसको कूल तौल लगभग २७ ग्राम रहेको र मूल्य लगभग पाँच लाख रुपियाँ आकलन गरिएको छ। पुलिसले घटनास्थलबाट बड़ौतको किदवई नगर निवासी नदीम उर्फ बिल्डरलाई पक्राउ गरेको छ। सोधपुछका क्रममा आरोपीले दिल्लीबाट स्म्याक ल्याएर बड़ौतमा महँगो मूल्यमा बेच्ने गरेको स्वीकार गरेको पुलिसले जनाएको छ।
थाना कोतवाली बागपत पुलिसले जाँच अभियानका क्रममा अर्का आरोपी बागपत निवासी अल्लादीनका छोरा अरमानलाई पक्राउ गरेको छ। आरोपीको कब्जाबाट ११०८ ग्राम अवैध गाँजा जफत भएको छ। पुलिसले दुवै घटनामा लागुऔषध नियन्त्रण सम्बन्धी कानूनका सम्बन्धित धारा अन्तर्गत मुद्दा दर्ता गरी थप कानूनी कारबाही शुरु गरेको छ।
बागपतका क्षेत्राधिकारी सुकन्या शर्माले जिल्लामा लागुऔषध तस्करी विरुद्ध अभियान निरन्तर जारी रहने र यसमा संलग्न कुनै पनि आरोपीलाई नछाड़िने बताइन्।
हिन्दुस्थान समाचार / भवानी थामी
