नयॉं दिल्ली, १६ सेप्टेम्बर (हि.स.)। प्रवर्तन निर्देशनालय (ईडी) ले पश्चिम बंगाल र मध्य प्रदेशसँग सम्बन्धित दुई छुट्टाछुट्टै मामिलामा कारबाही गरेको छ। ईडीको कोलकाता क्षेत्रीय कार्यालयले अमृत समूहका कम्पनीसँग सम्बन्धित निर्देशक तथा प्रवर्तकहरूको कोलकाता र इन्दौरस्थित १७ आवासीय तथा कार्यालय परिसरमा धनशोधन निवारण ऐनअन्तर्गत खोज तथा जफत कारबाही गरेको छ। यसैबीच, भूमि कब्जा, दस्तावेजमा जालसाजी तथा जग्गाका रेकर्डमा हेरफेर गरेको आरोपमा ईडीले मंगलबार राति अमित गांगुलीलाई पक्राउ गरेको छ।

ईडीका अनुसार, अमृत समूहका कम्पनी तथा त्यसका निर्देशकहरूले विभिन्न निक्षेप योजनाका नाममा सर्वसाधारणबाट ठूलो रकम संकलन गरेका थिए। लगानीकर्तालाई उच्च प्रतिफल दिने आश्वासन दिइएको भए पनि कथित रूपमा वाचा गरिएको प्रतिफल फिर्ता गरिएको थिएन। यही मामिलामा समूहसँग सम्बन्धित केसी दुजारी, काली किशोर बागची लगायत अन्य निर्देशक तथा प्रवर्तकहरूको परिसरमा खोज तथा जफत कारबाही भइरहेको छ। कोलकाता र इन्दौरस्थित कुल १७ आवासीय तथा कार्यालय परिसरमा यो कारबाही गरिएको हो।

अर्को मामिलामा ईडीले अमित गांगुलीलाई भूमि कब्जा, दस्तावेज तथा जग्गाका रेकर्डमा जालसाजी र पावर अफ अटर्नीसँग सम्बन्धित अनियमितताको आरोपमा पक्राउ गरेको हो। ईडीको अनुसन्धानअनुसार, गांगुलीले विभिन्न व्यक्ति तथा संस्थाको सम्पत्तिमाथि कथित रूपमा गैरकानुनी तरिकाले नियन्त्रण हासिल गरेका थिए।

ईडीका अनुसार, यसका लागि नक्कली सञ्चालक समितिका प्रस्ताव प्रयोग गर्ने, नक्कली हस्ताक्षर भएका बिक्री सम्झौता तयार गर्ने, जाली कागजात तथा लिखत बनाउने, जग्गाका अभिलेखमा हेरफेर गर्ने तथा झुटा वा नक्कली दाबीका आधारमा देवानी मुद्दा दायर गर्ने जस्ता तरिका अपनाइएको आरोप छ। सम्बन्धित जग्गाधनीको वैध अधिकार अस्वीकार गर्नुका साथै आफ्नो अधिकारका लागि अघि आउने व्यक्तिलाई धम्की दिने र शारीरिक बल प्रयोग गर्ने प्रयाससमेत गरिएको अनुसन्धान एजेन्सीले आरोप लगाएको छ।

अनुसन्धानका क्रममा अमित गांगुलीविरुद्ध पश्चिम बंगाल पुलिसमा दर्ता भएका २३ वटा प्राथमिकीसमेत फेला परेको ईडीले जनाएको छ। एजेन्सीका अनुसार, यी मुद्दा कथित रूपमा सम्पत्ति धोखाधडी तथा गैरकानुनी तरिकाले प्राप्त गर्ने र त्यससँग सम्बन्धित कारोबारसँग जोडिएका छन्। ईडीले यी घटनाबाट सम्पत्तिमाथि नियन्त्रण हासिल गर्न एउटै प्रकारका गैरकानुनी गतिविधि निरन्तर रूपमा गरिएको संकेत देखिएको जनाएको छ।

हिन्दुस्थान समाचार / भवानी थामी