पुरुलिया, १९ सेप्टेम्बर (हि.स.)। पुरुलियाको टामना थाना क्षेत्रअन्तर्गत रामकृष्णपल्लीस्थित मेसमा युवतीको हत्या भएको घटनामा पुलिसले जॉंच तीव्र बनाएको छ। शुक्रबार साँझ पुलिसले आरोपी प्रेमी अमित महतो र मेस सञ्चालकलाई साथमा लिएर पुनः घटनास्थल पुगेको थियो। पुलिसको उपस्थितिमा बन्द कोठाभित्र खानतलासी गर्नुका साथै घटनाक्रमको पुनर्निर्माण गरिएको छ।
स्रोतका अनुसार, हत्यामा प्रयोग गरिएको धारिलो हतियारको पहिचान भइसकेको छ। फिङ्गरप्रिन्ट विशेषज्ञको उपस्थितिमा उक्त हतियारबाट प्रमाण संकलन गर्ने तयारी भइरहेको छ। यद्यपि, हतियार बरामद गर्ने उद्देश्यले अमितलाई घटनास्थलमा लगिएको हो वा होइन भन्ने विषयमा पुलिसले स्पष्ट पारेको छैन। पुलिसले युवतीको पोस्टमार्टमको अन्तिम रिपोर्ट अझै प्राप्त नभएको जनाएको छ।
घटनापछि जिल्ला पुलिसले पुरुलिया शहर तथा छेउछाउका विद्यार्थी मेसहरूमा विशेष निगरानी राख्ने निर्णय गरेको छ। महिला पुलिसको ‘विनर्स टोली’ ले अब सबै मेसमा नियमित निगरानी गर्ने जनाइएको छ।
यसैबीच, पुरुलिया शहरको आईटी पार्क क्षेत्रमा रहेको उक्त संस्थानका विद्यार्थी तथा शिक्षकहरूमा पनि घटनालाई लिएर आक्रोश देखिएको छ, जहाँ मृतक युवती नर्सिङसम्बन्धी तालिम लिइरहेकी थिइन्। संस्थानका प्रमुखका अनुसार, केही समयको अन्तरालपछि युवतीले गत २६ जूनमा भर्ना लिएकी थिइन् र नियमित रूपमा कक्षामा उपस्थित हुँदै आएकी थिइन्।
संस्थानका शिक्षक तथा विद्यार्थीहरूले आरोपीलाई मृत्युदण्ड दिनुपर्ने तथा मुद्दाको सुनुवाई द्रुत अदालतमार्फत गर्नुपर्ने माग गरेका छन्।
हिन्दुस्थान समाचार / भवानी थामी
