गान्तोक, 30 सेप्टेम्बर (हि.स.)। सिटिजन एक्सन पार्टी (सीएपी) सिक्किमको समन्वय बैठक आज पार्टी अध्यक्ष गणेश के. राईको अध्यक्षतामा रानीपुलस्थित पार्टी मुख्यालयमा सम्पन्न भयो। बैठकमा पार्टीका सल्लाहकारहरू, उपाध्यक्षहरू, जिल्ला अध्यक्षहरू, महासचिवहरू, परिषद् प्रमुखहरू र अन्य वरिष्ठ पार्टी पदाधिकारीहरूको उपस्थिति थियो।
बैठकमा प्रो. महेन्द्र पी. लामाद्वारा प्रस्तावित 'चौथो मार्ग' लाई लिएर १ अक्टोबर, २०२६ मा प्रस्तावित 'पिपल्स र्याली' बारे छलफल गरिएको प्रेस विज्ञप्तिमा उल्लेख छ।
बैठकलाई सम्बोधन गर्दै पार्टी अध्यक्ष गणेश के. राईले प्रस्तावित र्याली पूर्ण रूपमा शान्तिपूर्ण र गैर-राजनीतिक हुनुपर्ने तथा सिक्किमको बृहत्तर हितमा सञ्चालन गरिनुपर्ने बताए। उनले यो कार्यक्रम सिक्किमको पहिचान, भौगोलिक अखण्डता तथा यसको संवैधानिक र राष्ट्रिय हितसँग सम्बन्धित मुद्दाहरूमा केन्द्रित हुनुपर्ने कुरामा जोड दिए।
पार्टी अध्यक्षले सबै सहभागीहरूलाई राजनीतिक भाषण वा दलीय मन्तव्य दिनबाट बच्न तथा र्यालीलाई राजनीतिक प्रचार-प्रसारको मञ्च नबनाउन आग्रह गरे। उनले सबैलाई अनुशासन, शान्ति र मर्यादा कायम राख्न तथा कार्यक्रमलाई सिक्किम-केन्द्रित र जन-उन्मुख बनाउन आह्वान गरे।
राईले सिक्किमभरिका समाजका सबै वर्गका मानिसहरूलाई शान्तिपूर्ण रूपमा र्यालीमा सहभागी हुन र लोकतान्त्रिक तथा संवैधानिक माध्यमबाट आफ्ना सरोकारहरू व्यक्त गर्न आह्वान गरे। उनले पार्टीका सदस्यहरू, समर्थकहरू र आम जनतालाई १ अक्टोबरको र्यालीमा जिम्मेवारीपूर्वक सहभागी हुन तथा उक्त र्याली शान्तिपूर्ण, अनुशासित र दलीय राजनीतिक गतिविधिबाट मुक्त रहने सुनिश्चित गर्न आह्वान गरे।
हिन्दुस्थान समाचार / बिशाल
