गान्तोक, 30 सेप्टेम्बर (हि.स.)। सिक्किमकी चलचित्र निर्देशक नियारा सुब्बाले आफ्नो चलचित्र ‘नुमाहाङ्मा’ का लागि लन्डनमा आयोजित दोस्रो नेपाल इन्डिजिनियस फिल्म फेस्टिभल (एनआईएफएफ) २०२६ मा उत्कृष्ट नवोदित निर्देशकको पुरस्कार प्राप्त गरेकी छन्।
एचएम सुब्बाद्वारा निर्मित ‘नुमाहाङ्मा’ गत २७ सेप्टेम्बरमा महोत्सव लन्डनमा प्रदर्शन गरिएको थियो। महोत्सवमा आदिवासी, कथानक, फिचर फिल्म, वृत्तचित्र तथा छोटा चलचित्रलगायत विभिन्न विधाका उत्कृष्ट चलचित्रलाई सम्मान गरिएको हो।
९० मिनेट लामो यो फिचर चलचित्र पहिलोपटक सन् २०२५ मा गान्तोकमा प्रदर्शन गरिएको थियो। चलचित्रको कथा १९४० को दशकमा ब्रिटिस भारतको समयमा पहाडी क्षेत्रमा बसोबास गर्ने एक संघर्षशील महिलाको जीवनमा आधारित छ। उनले आफ्नी छोरीको उज्ज्वल भविष्य सुनिश्चित गर्न अनेक चुनौतीको सामना गरेको कथा चलचित्रमा प्रस्तुत गरिएको छ।
आफ्नी छोरी एचएम सुब्बालाई त्यस क्षेत्रबाट म्याट्रिक परीक्षा उत्तीर्ण गर्ने पहिलो महिला बनाउन उनले गरेको संघर्षलाई चलचित्रले विशेष रूपमा चित्रण गरेको छ। ‘नुमाहाङ्मा’ ले एउटी महिलाको संघर्ष, दृढता र निरन्तर प्रयासमार्फत उनले समाजका लागि प्रेरणादायी उदाहरण प्रस्तुत गरेको कथा उजागर गरेको छ।
यस चलचित्रले यसअघि नेपालमा आयोजित दोस्रो याक्थुङ सिने अवार्ड्स इन्टरनेसनल (वाईसीएआई) २०८२ मा पनि महत्वपूर्ण सफलता हासिल गरेको थियो। चलचित्रले उत्कृष्ट चलचित्र र उत्कृष्ट निर्देशकको पुरस्कार प्राप्त गरेको थियो भने नियारा सुब्बाले उत्कृष्ट निर्देशकको पुरस्कार जितेकी थिइन्।
चलचित्रको संवेदनशील निर्देशन, मुख्य पात्रको प्रस्तुति, सांस्कृतिक पक्षको चित्रण तथा विशिष्ट सिनेम्याटिक प्रस्तुतिका लागि नियारा सुब्बाको निर्देशनले विभिन्न पुरस्कारमार्फत प्रशंसा पाएको छ।
हालै प्राप्त पुरस्कारबारे प्रतिक्रिया दिँदै सुब्बाले यो सम्मान चलचित्रमा संलग्न सम्पूर्ण टोलीको सामूहिक प्रयासको परिणाम भएको बताइन्। उनले कलाकारदेखि पर्दापछाडि काम गर्ने सबैको योगदानलाई यसको श्रेय दिँदै यस सम्मानले चलचित्र तथा साहित्यको क्षेत्रमा अझ योगदान गर्न आफूलाई थप प्रेरणा दिएको बताइन्।
यो पुरस्कार ‘नुमाहाङ्मा’ को दोस्रो अन्तरराष्ट्रिय सम्मान हो। यसले सिक्किमको उदीयमान चलचित्र क्षेत्रसँगै यहाँका चलचित्रकर्मी, आदिवासी कथा तथा सांस्कृतिक कथावस्तुलाई अन्तरराष्ट्रिय मञ्चमा थप पहिचान दिलाउन योगदान पुर्याएको छ।
हिन्दुस्थान समाचार / बिशाल
