सोरेङ, 30 सेप्टेम्बर (हि.स.)। मुख्यमन्त्री पीएस तामाङले बुधवार रेशी सरकारी माध्यमिक विद्यालयको खेल मैदानमा ज्ञानोदय संस्थानद्वारा आयोजित 157औँ गान्धी जयन्तीको पूर्व-समारोहमा सहभागिता जनाएका छन्। मुख्यमन्त्रीको आगमनमा उनलाई दोस्रो आईआरबीएन, पिपलेद्वारा गार्ड अफ् अनर दिइयो।

सभालाई सम्बोधन गर्दै मुख्यमन्त्रीले उक्त निर्वाचन क्षेत्रमा आफ्नो विगतको कार्य-अनुभवबारे चर्चा गर्नुका साथै वर्षौँदेखि जनताबाट प्राप्त सहयोग र सद्भावको स्मरण गरे। उनले प्रत्येक निर्वाचन क्षेत्रको भ्रमण गर्ने र जनतासँग प्रत्यक्ष संवाद गर्ने कार्यलाई पुनः निरन्तरता दिने साथै यस्ता अन्तरक्रियाहरूले स्थानीय सरोकार र आकाङ्क्षाहरू बुझ्ने अवसर प्रदान गर्ने उल्लेख गरे।

मुख्यमन्त्रीले रिञ्चेनपोङका पूर्व विधायक केएस लेप्चाले पुर्‍याएको सहयोगको कदर र प्रशंसा गर्दै रिञ्चेनपोङका वर्तमान विधायक इरूङ तेञ्जिङ लेप्चाको प्रयासको पनि सराहना गरे। उनले उक्त निर्वाचन क्षेत्रका जनतालाई विकास र प्रगतिका लागि एकजुट भएर काम गर्न आह्वान गरे।

मुख्यमन्त्रीले राज्य सरकारका विभिन्न कल्याणकारी योजना विशेषगरी आमा योजनामाथि प्रकाश पारे। उनले हाल 32 वटै निर्वाचन क्षेत्रका आमाहरू यस योजनामा समेटिएको र लाभग्राहीहरूले आर्थिक सहयोग प्राप्त गरिरहेको जानकारी दिँदै आगामी वर्षहरूमा यस पहललाई अझ विस्तार गरिने बताए। उनले सिक्किम गरीब आवास योजनाअन्तर्गत प्राप्त हुने लाभहरूको पनि चर्चा गरे र सरकारी योजनाहरू वास्तविक रूपमा योग्य तथा खाँचोमा परेका व्यक्तिहरूसम्म पुगेको सुनिश्चित गर्न लाभग्राहीहरूको उचित प्रमाणीकरण र पहिचानको आवश्यकतामा जोड़ दिए।

निर्वाचन क्षेत्रको प्रगतिको सन्दर्भमा बोल्दै मुख्यमन्त्रीले उक्त क्षेत्रबाट एमबीबीएस अध्ययन गरिरहेका र आर्थिक सहयोग प्राप्त गरेका विद्यार्थीहरूको बढ्दो सङ्ख्या तथा विभिन्न आधिकारिक पदहरूमा कार्यरत् यस क्षेत्रका व्यक्तिहरूको उल्लेख गरे। उनले तीमध्ये धेरै विद्यार्थी सरकारी विद्यालयका पूर्व विद्यार्थी रहेको बताउँदै उनीहरूको उपलब्धिलाई सरकारी शिक्षामा भइरहेको निरन्तर सुधारको सङ्केतका रूपमा वर्णन गरे।

मुख्यमन्त्रीले रिक्त पदहरूको विज्ञापनमार्फत नियमित रूपमा नयाँ रोजगारीका अवसरहरू सिर्जना गर्ने सरकारको प्रयासमाथि पनि प्रकाश पारे। निर्वाचन क्षेत्रका उपलब्धिहरूको कदर गर्दै उनले नेपाल पोएट आइडलमा सोनाम डोङको सहभागिता र सिक्किमको प्रतिनिधित्वको पनि चर्चा गरे।

मुख्यमन्त्रीले कृषिमा आधारित गतिविधिहरूलाई प्रवर्द्धन गर्न स्थानीय बासिन्दाहरूले गरेको प्रयासको प्रशंसा गरे। उनले यस क्षेत्रमा सञ्चालित विभिन्न पूर्वाधार परियोजना (जुन सम्पन्न हुने चरणमा रहेका र प्रक्रियामा रहेका योजनाहरू समावेश छन्) बारे पनि जानकारी दिए। उनले जिल्लामा धेरै सड़कको निर्माणका लागि बजेट विनियोजन भइसकेको र सम्बन्धित अधिकारीहरूलाई बर्खायामपछि ती कार्यहरू तीव्र गतिमा अघि बढ़ाउन निर्देशन दिए।

पूर्वाधार र सम्पर्क सञ्जालका विषयमा मुख्यमन्त्रीले रोकिएका सड़क निर्माण कार्यहरू पूर्ण रूपमा सम्पन्न गरिने आश्वासन दिए। उनले बढ्दो सवारी चाप र पार्किङको समस्यालाई मध्यनजर गर्दै वन कार्यालयलाई सोरेङस्थित पुरानो बीएसी कार्यालयमा सारिने र हालको स्थानलाई पार्किङ प्लाजा निर्माणका लागि प्रयोग गरिने जानकारी दिए। मुख्यमन्त्रीले रिञ्चेनपोङमा पनि एक व्यवस्थित पार्किङ सुविधा विकास गरिने बताए।

मुख्यमन्त्रीले उपस्थित जनसमुदायलाई पूर्वाधार र अन्य अत्यावश्यक सुविधाहरूसँग सम्बन्धित मागहरू सम्बोधन गरिने आश्वासन दिए। उनले सरकारी योजना र पहलहरूबारे जानकारी फैलाउन ‘रिल्स’ र डिजिटल सामग्री निर्माण गर्ने सिर्जनाकर्ताहरूलाई वार्षिक रूपमा आर्थिक सहयोग उपलब्ध गराइने घोषणा पनि गरे।

अन्त्यमा, मुख्यमन्त्रीले सबैलाई महात्मा गान्धीका आदर्शहरू आत्मसात गर्न र राज्यको विकास तथा प्रगतिका लागि सामूहिक रूपमा योगदान पुर्‍याउन आह्वान गरे।

कार्यक्रमको शुरुआतमा रिञ्चेनपोङका विधायक इरूङ तेञ्जिङ लेप्चाले स्वागत सम्बोधन राखे। रेशीमा यसअघि मनाइएका गान्धी जयन्तीका कार्यक्रमहरूको स्मरण गर्दै उनले 22 वर्षको अन्तरालपछि यो कार्यक्रम पुनः आयोजना गरिएको विषयमा जोड़ दिए। उनले मुख्यमन्त्री मन्त्री हुँदा यस निर्वाचन क्षेत्रको प्रतिनिधित्व गर्दा पहिले पनि यस्ता कार्यक्रमहरू आयोजना गरिएको स्मरण गरे र यो पुनरागमन पुरानो सम्झनालाई ताजा बनाउने तथा यस अवसरको विरासतसँग पुनः जोड़िने प्रयास भएको बताए।

विधायकले विद्यालयहरूको स्तरोन्नति र रेशी बजारको विकासमा मुख्यमन्त्रीको योगदानको कदर गर्दै यी विकास कार्यहरूले यस क्षेत्रको प्रगतिमा महत्त्वपूर्ण भूमिका निर्वाह गरेको बताए। रिञ्चेनपोङ निर्वाचन क्षेत्रका जनताको तर्फबाट उनले निर्वाचन क्षेत्रमा भइरहेको विकास र हालैका वर्षहरूमा सिर्जना भएका नयाँ अवसरहरूका लागि मुख्यमन्त्रीप्रति आभार व्यक्त गरे।

कार्यक्रमअवधि मुख्यमन्त्रीलाई रेशी सरकारी माध्यमिक विद्यालय र ज्ञानोदय संस्थानद्वारा सम्मान गरियो। रिञ्चेनपोङ निर्वाचन क्षेत्रअन्तर्गत सल्लाहकारगण, अध्यक्षगण, ओएसडी र अन्य विशिष्ट व्यक्तिहरूले रिम्बी आपदाका लागि मुख्यमन्त्री राहत कोषमा सहयोग पनि प्रदान गरे।

कार्यक्रममा वरिष्ठ माध्यमिक तहको अन्तरविद्यालय तर्क प्रतियोगिता तथा दोदक एफसी र ब्लुशिप एफसीबीच फुटबलको सेमिफाइनल खेल पनि आयोजना गरिएको थियो।

कार्यक्रममा सड़क तथा पुल विभागका मन्त्री एनबी दाहाल, विधायकगण, मुख्यमन्त्रीका राजनीतिक सचिव जेकब खालिङ, जिल्ला अध्यक्ष तिला देवी गुरुङसहित अन्यको उपस्थिति रहेको थियो।

हिन्दुस्थान समाचार / बिशाल