गान्तोक, 05 सेप्टेम्बर (हि.स.)। राजधानीमा आयोजना हुने आगामी योनेक्स सनराइज ४९औँ जुनियर राष्ट्रिय ब्याडमिन्टन च्याम्पियनसिप २०२६ को तयारी तीव्र पारिएको छ। यस क्रममा ब्याडमिन्टन एसोसिएसन अफ सिक्किम (बीएएस) ले आज राज्यका मुख्य सचिव रविन्द्र तेलाङ, आईएएससँग महत्वपूर्ण बैठक गरेको छ। आगामी १४ देखि २१ नोभेम्बर, २०२६ सम्म गान्तोकमा आयोजना हुने राष्ट्रियस्तरको प्रतिष्ठित प्रतियोगिताको तयारी र व्यवस्थापनबारे बैठकमा विस्तृत छलफल गरिएको प्रेस विज्ञप्तिमा उल्लेख छ।
बैठकमा राज्य खेलकुद तथा युवा मामिला विभागकी सचिव याङछेन डी. तामाङ, बीएएसका अध्यक्ष जेकब खालिङ, वरिष्ठ उपाध्यक्ष छिरिङ पाल्देन भोटिया, उपाध्यक्ष महेन्द्र छेत्री, मुख्य संयोजक डेभिड जी. लिङ्दोङ तथा कार्यकारी सदस्यहरू नर्बु डाडुल र छिरिङ शेर्पा उपस्थित थिए।
मुख्य सचिवको अध्यक्षतामा सम्पन्न बैठकमा बीएएसका प्रतिनिधिमण्डलले प्रतियोगिताको राष्ट्रिय महत्व, आयोजनाका लागि भइरहेको तयारी तथा आवश्यक व्यवस्थापनबारे जानकारी गरायो। बैठकमा मुख्य सचिवले मुख्यमन्त्री प्रेमसिंह तामाङको निर्देशनअनुसार उक्त राष्ट्रिय ब्याडमिन्टन च्याम्पियनसिपलाई राज्यस्तरीय कार्यक्रमको दर्जा प्रदान गरिने जानकारी दिए। मुख्यमन्त्रीले प्रतियोगिता सफलतापूर्वक आयोजना गर्न सम्बन्धित सबै विभागलाई आवश्यक सहयोग र समन्वय उपलब्ध गराउन निर्देशन दिएको पनि उनले बताए।
मुख्य सचिवले प्रतियोगिता सफल बनाउन सिक्किम सरकार तथा सम्बन्धित सबै विभागबाट पूर्ण सहयोग र सहकार्य उपलब्ध गराउने आश्वासन दिए। प्रतियोगिता सहज, व्यवस्थित र उच्च व्यावसायिक मापदण्डअनुसार सम्पन्न गर्न आवश्यक सबै प्रकारको सहयोग तथा समन्वय गरिने उनले बताए।
यसैबीच, मुख्य सचिव तेलाङले प्रतियोगिताको आयोजन समितिको संरक्षकका रूपमा जिम्मेवारी निर्वाह गर्न सहमति जनाएको बताइएको छ। आयोजन समितिसँग उनको संलग्नताले प्रतियोगिताको तयारी, समन्वय र व्यवस्थापनलाई थप मजबुत बनाउने अपेक्षा गरिएको छ।
बीएएसले मुख्यमन्त्री प्रेमसिंह तामाङ, मुख्य सचिव रविन्द्र तेलाङ तथा सिक्किम सरकारप्रति मार्गदर्शन, सहयोगको आश्वासन र निरन्तर प्रोत्साहनका लागि हार्दिक आभार व्यक्त गरेको छ। सरकारको प्रतिबद्धताले प्रतियोगिताको तयारीलाई थप गति दिएको र सिक्किममा स्मरणीय, व्यवस्थित तथा व्यावसायिक ढंगले राष्ट्रियस्तरको प्रतियोगिता आयोजना गर्ने आफ्नो संकल्पलाई थप बलियो बनाएको बीएएसले जनाएको छ।
हिन्दुस्थान समाचार / बिशाल
