नयाँ दिल्ली, ६ सेप्टेम्बर (हि.स.)। लोकसभामा विपक्षी दलका नेता राहुल गान्धीले बिहारमा विद्यार्थी आन्दोलनका क्रममा पुलिस कारबाहीमा घाइते भएका युवाहरूलाई भेटेका छन्। उनले ती विद्यार्थीहरूले शिक्षा, रोजगारी र जवाफदेहिता मात्र मागेको तर उनीहरूमाथि गोली चलाइएको बताए।

राहुल गान्धीले आइतवार सामाजिक सञ्जाल ‘एक्स’ मा एउटा भीडियो साझा गरेका छन्। भीडियोमा उनी आफ्नो निवासमा बिहारका तीन घाइते विद्यार्थी मोहम्मद आरिफ, बुलेट कुमार गौड़ र आकाश कुमारसँग कुराकानी गरिरहेको देखिन्छ। बुलेट कुमार गौड़को खुट्टामा गोली लागेको छ र उनी बैसाखीको सहारामा हिँड़िरहेका छन्। अन्य दुई विद्यार्थीको काँधमा गोली लागेको बताइएको छ।

राहुल गान्धीले आफ्नो पोस्टमा लेखेका छन्, “सोच्नुहोस्, यी विद्यार्थीहरूले यस्तो के अपराध गरेका थिए, जस कारण उनीहरूलाई गोली हानियो? उनीहरूले सरकारसँग शिक्षा, रोजगारी र जवाफदेहिता गरी केवल तीन कुरा मागेका थिए। एक विद्यार्थीको खुट्टाको हड्डी एके–४७ को गोलीले भाँचिएको छ। सेनामा भर्ती भएर देशको सेवा गर्ने उनको सपना पनि त्यसैसँग टुट्यो। अन्य दुई विद्यार्थीको काँधलाई गोली छेड़ेर गएको छ। उनीहरू अपराधी थिएनन्। उनीहरू गरीब परिवारका ती नानीहरू थिए, जो आफ्नो परिवारको सपना बोकेर पढ्न निस्केका थिए—कसैलाई राम्रो जागिर चाहिएको थियो भने कसैलाई आफ्नो घरको अवस्था परिवर्तन गर्नुथियो।”

भीडियोमा राहुल गान्धीले विद्यार्थीहरूसँग कुराकानी गर्दै उनीहरूको स्वास्थ्य अवस्थाबारे जानकारी लिएको तथा चोटपटकको अवस्था हेरेको देखिन्छ। एक विद्यार्थीले सेनामा भर्ती भएर देशको सेवा गर्ने आफ्नो चाहना रहेको तर गोली लागेपछि आफ्नो सपना टुटेको बताए। अर्का विद्यार्थीले आफूहरू परीक्षा प्रणालीमा भएको अनियमितता र प्रश्नपत्र लीक विरुद्ध शान्तिपूर्ण प्रदर्शन गरिरहेको बताए। तेस्रो विद्यार्थीले काँधमा गोली लागेपछि हातले राम्रोसँग काम गर्न नसकेको जानकारी दिए।

यस क्रममा राहुल गान्धीले एक विद्यार्थीको खुट्टाको चोटको दिल्लीमा राम्रो उपचार गराउने व्यवस्था मिलाउने आश्वासन दिए। उनले विद्यार्थीहरूलाई आवश्यक सहयोग गर्ने प्रतिबद्धता जनाउँदै आफू उनीहरूको साथमा रहेको बताए।

/ बिशाल