गान्तोक, 04 सेप्टेम्बर (हि.स.)। सिक्किमको पर्यटन एवं नागरिक उड्डयन विभाग मन्त्री छिरिङ टी. भोटियाले आधिकारिक दिल्ली भ्रमणको क्रममा इण्डियन क्रिकेट टीमका कोच गौतम गम्भीरसॅंग भेट गरे। यस क्रममा सिक्किममा खेलकुद र पर्यटन प्रवर्द्धनमा ध्यान केन्द्रित गर्दै राष्ट्रको विकासको माध्यमका रूपमा खेलकुदको सम्भावनाबारे छलफल गरे।
मन्त्री भोटियाले सिक्किमको प्राकृतिक सुन्दरता र विभिन्न खेलकुदको निम्ति अनुकूल पर्यावरणबारे अवगत गराउॅंदै खेलकुद गतिविधिहरूको निम्ति सिक्किम केन्द्र बन्न सक्ने सम्भावनाहरूको बारेमा चर्चा गरे। उनले भने, सिक्किम खेलकुद पर्यटन र सम्बद्ध गतिविधिहरूको निम्ति प्रमुख गन्तव्य बन्ने सम्भावना छ। मन्त्रीले राज्यमा खेलकुद प्रवर्द्धनका लागि भविष्यमा मिलेर काम गर्ने आशा व्यक्त गरे।
पर्यटन मन्त्री भोटिया दिल्लीमा 5 सेप्टेम्बरका दिन उद्योगमाथि प्रस्तावित केन्द्रिय मन्त्रीहरूको सम्मेलनमा भाग लिन दिल्लीमा छन्। उक्त सम्मेलन केन्द्रिय उद्योग एवं वाणिज्य मन्त्री पीयूष गोयलको अध्यक्षता हुने बताइएको छ।
हिन्दुस्थान समाचार / बिशाल
15 Jan 2025