दुबई, २१ अक्टोबर (हि.स.)। विश्वकै सबैभन्दा अग्लो भवन बुर्ज खलिफा सोमबार दीपावलीको अवसरमा विशेष सन्देशसहित आकर्षक बत्तीको उज्यालोमा झलमल्यायो। अन्धकारमाथि ज्ञानको प्रकाशको विजयको प्रतीक यो महान् पर्वको अवसरमा दुबईको यस प्रतिष्ठित स्थलमा अंग्रेजी र हिन्दी दुवै भाषामा शुभकामना सन्देश प्रदर्शन गरिएको थियो। यससँगै यस वर्ष दुबईमा आयोजित दुई प्रमुख दीपावली कार्यक्रमहरूमा दुबई पुलिस ब्याण्डको विशेष प्रस्तुति पनि मुख्य आकर्षण बन्यो।

गल्फ न्यूजका अनुसार, ८२८ मिटर अग्लो यो विश्वप्रसिद्ध भवनमा गरिएको झिलिमिली प्रदर्शनले संयुक्त अरब इमिरेट्स (यूएई) का विविध समुदायहरूलाई दीपावलीको हार्दिक शुभकामना दियो। अंग्रेजीमा लेखिएको सन्देश थियो— “रोशनीको पर्वले खुशी, सद्भाव र समृद्धि ल्याओस्। तपाई र तपाईको परिवारलाई दीपावलीको शुभकामना।” त्यसपछि यही सन्देश हिन्दी भाषामा पनि प्रदर्शन गरिएको थियो र सबैलाई “रोशनीको पर्व” को शुभकामना दिइएको थियो।

कार्यक्रमको भिडियो सामाजिक सञ्जालमा साझा गर्दै एम्मारले लेख्यो — “बुर्ज खलिफा रोशनीको पर्वको उत्सवमा झलमल्याएको छ। यस अवसरमा हार्दिक शुभकामना।”

यस वर्षको दिपाली समारोहमा दुबई पुलिस ब्याण्डको प्रस्तुति विशेष रूपमा प्रशंसनीय रह्यो। यस ब्याण्डले अल सीफमा आयोजित दुबईको १०-दिने दिवाली उत्सव ‘नूर: रोशनीको पर्व’ को आधिकारिक उद्घाटन समारोहमा र भारतीय प्रवासी समुदायद्वारा आयोजना गरिएको दिवाली कार्यक्रममा आफ्नो प्रस्तुति दिएको थियो। ब्याण्डले बलिउडको प्रसिद्ध गीत “तुझे देखा तो ये जाना सनम” को शानदार प्रस्तुति दिएर करिब १०,००० उपस्थित दर्शकलाई मन्त्रमुग्ध बनायो।

यस उत्सवमा १०० भन्दा बढी टोलीहरूको सहभागितासहित रंगोली प्रतियोगिता र भारतका १५ वटा राज्यका कलाकारहरूले भाग लिएका लोकनृत्य प्रतियोगिता पनि आयोजना गरिएको थियो।

दुबईस्थित भारतीय वाणिज्य दूतावासको संरक्षणमा एफओआई इभेन्ट्सद्वारा आयोजित यस कार्यक्रमबारे महावाणिज्यदूत सतीश कुमार सिवनले अल सीफ कार्यक्रममा दुबईको अनन्य समर्थनप्रति प्रशंसा जनाउँदै भने —

“दुबई बाहेक संसारमा यो सम्भव हुने ठाउँ छैन। यो प्रेमको, यो समावेशिताको उदाहरण हो, जुन यहाँको नेतृत्वले हामीलाई देखाउँछ।”

--------------

हिन्दुस्थान समाचार / भवानी थामी