नयाॅं दिल्ली, १३ नोभेम्बर (हि.स.)। विश्वव्यापी व्यापारिक अनिश्चितताका बीच भारत सरकारले निर्यातलाई प्रवर्धन गर्न ४५ हजार करोड रुपियाँको बुस्टर प्याकेज घोषणा गरेकोमा प्रधानमन्त्री नरेन्द्र मोदीले यसलाई विश्वव्यापी प्रतिस्पर्धालाई सुधार गर्ने कदम बताएका छन्। उनले भने, सरकारका निर्यात प्रोत्साहन सम्बन्धी निर्णयहरूले देशको विश्वव्यापी प्रतिस्पर्धा मजबुत गर्नेछन्, आपूर्ति शृंखलाहरूलाई सशक्त बनाउनेछन् र रोजगारका नयाँ अवसरहरू सिर्जना गर्नेछन्।

प्रधानमन्त्रीले तीन अलग-अलग पोस्टहरूमा यस निर्णयलाई आत्मनिर्भर भारतको सपनालाई पूरा गर्ने दिशामा ठूलो कदम बताएका छन्। उनले भने, मन्त्रिपरिषदद्वारा स्वीकृत क्रेडिट ग्यारेन्टी स्किमले निर्यातकहरूलाई वित्तीय सञ्चालनमा सहयोग गर्नेछ र भारतको विश्वव्यापी प्रतिस्पर्धी स्थिति अझ बलियो बनाउनेछ। यसले भारतीय उद्योगको स्थिरता, आत्मनिर्भरता र रोजगार सिर्जनामा पनि योगदान पुर्‍याउनेछ।

अर्को एक पोस्टमा प्रधानमन्त्रीले भने, ‘मेड इन इन्डिया’ को आवाज विश्व बजारमा अझ प्रभावकारी सुनिनेछ। एक्सपोर्ट प्रमोशन मिशन अन्तर्गत एमएसएमई क्षेत्र, नयाँ निर्यातक र श्रम-प्रधान उद्योगहरूलाई विशेष लाभ हुनेछ। यस मिशनले प्रमुख सरोकारवालाहरूलाई जोड्दै प्रभावकारी र परिणाममुखी व्यवस्था तयार पार्नेछ।

उल्लेखनीय छ, सरकारले बुधबार ४५ हजार करोड़ रुपियाँको बुस्टर प्याकेज घोषणा गरेको छ, जसमा २५,०६० करोड़ रुपियाँ एक्सपोर्ट प्रमोशन मिशनका लागि र २० हजार करोड़ रुपियाँ क्रेडिट ग्यारेन्टी स्किम विस्तारका लागि छुट्याइएको छ। यो कदम भारतको निर्यात व्यापारलाई उच्च स्थानमा पुर्‍याउने र आत्मनिर्भर भारत लक्ष्यलाई साकार पार्ने निर्णायक पहल हो।

---------------

हिन्दुस्थान समाचार / भवानी थामी