गान्तोक, 3 नोभेम्बर (हि.स.)। सिक्किम पत्रकार संघ (जेयूएस) ले भारतीय पत्रकार संघ (आईजेयू) सँगको सहकार्यमा र पोल्याण्डको अन्तरराष्ट्रिय सम्बन्ध केन्द्रको सहयोगमा आज गान्तोकस्थित जनता भवनको हलमा 'मिडियामा दुष्प्रचार र गलत सूचना: यस डिजिटल युगमा ठूलो चुनौतीको सामना' विषयमाथि एक अन्तरक्रियात्मक सेमिनार सफलतापूर्वक आयोजना गर्‍यो।

कार्यक्रममा अन्तरराष्ट्रिय सम्बन्ध केन्द्र, पोल्याण्डकी अध्यक्ष तथा वारशा विश्वविद्यालयकी प्राध्यापक डा. माल्गोरजाता बोनिकोव्स्का र आईजेयूकी महासचिव सबिना इन्द्रजित मुख्य वक्ताका रूपमा उपस्थित थिए। कार्यक्रम को शुरुवात जेयूएसका अध्यक्ष सुजल प्रधानको स्वागत भाषण र परिचयबाट शुरु भए, जसमा उनले आजको द्रुत गतिमा विकसित डिजिटल वातावरणमा दुष्प्रचार र गलत सूचना बुझ्नुको महत्त्वमा जोड दिएका थिए।

सहभागीहरूसँग गहन अन्तरक्रियात्मक छलफलमा संलग्न हुनुअघि दुवै वक्ताहरूले संक्षिप्त परिचयात्मक टिप्पणीहरू प्रस्तुत गरे। कुराकानी कृत्रिम बुद्धिमत्ता (एआई) ले निम्त्याएका चुनौतीहरू, दुष्प्रचार र गलत सूचनाको प्रसार, र यसमा पूर्ण रूपमा निर्भर नभई एआईलाई सहयोगी उपकरणको रूपमा प्रयोग गर्ने आवश्यकतामा केन्द्रित थियो। यसैगरी, भारतमा प्रेस र मिडियाको वर्तमान अवस्थामाथि पनि प्रकाश पारिएको थियो।

डा. बोनिकोव्स्काले युरोपेली दृष्टिकोणहरूमाथि बहुमूल्य अन्तर्दृष्टि साझा गर्दै कसरी युरोपेली देशहरू, विशेष गरी पोल्याण्डले अभिव्यक्तिको स्वतन्त्रता र लोकतान्त्रिक मूल्यहरूको रक्षा गर्दै अनलाइन दुष्प्रचार र गलत सूचना नियन्त्रण गर्न व्यवस्थापन गरिरहेको छ भन्ने व्याख्या गरिन्।उनले रूस-युक्रेन युद्धका उदाहरणहरू उद्धृत गर्दै पोल्याण्ड र अन्य युरोपेली राष्ट्रहरूले कसरी सम्बन्धित चुनौतीहरूको सामना गर्छन् भन्ने कुरामाथि प्रकाश पारिन्।

उनले सिक्किम जस्ता संवेदनशील सीमावर्ती राज्यहरूमा मिडिया पेशेवरहरूका लागि विशेष गरी जिम्मेवार पत्रकारिताको महत्त्वमा जोड दिइन्। डा. बोनिकोव्स्काले युरोपका लोकतान्त्रिक राष्ट्रहरूमा पत्रकारहरू चीन र रूस जस्ता अधिनायकवादी राज्यहरू, जहाँ प्रेस स्वतन्त्रता प्रतिबन्धित छ, को सट्टामा भारत जस्ता अन्य लोकतान्त्रिक देशहरूका विश्वसनीय र पारदर्शी स्रोतहरूमा भर पर्छन् भनी बताइन्।

कार्यक्रममा जेयूएसका सदस्यहरूसहित विभिन्न समाचार संस्थाहरूको प्रतिनिधित्व गर्ने पत्रकारहरू र मिडियाकर्मीहरूको सक्रिय सहभागिता रहेको थियो। कार्यक्रममा जेयूएसका उपाध्यक्ष वाङ्छेन लामाले धन्यवाद प्रस्ताव प्रस्तुत गरेका थिए।

हिन्दुस्थान समाचार / बिशाल