सोरेङ, 17 मार्च (हि.स.)। सोरेङ च्याखुङ निर्वाचन क्षेत्रका विधायक आदित्य गोले आज दोदक सरकारी माध्यमिक विद्यालयको प्लेटिनम जुबलीको दोस्रो दिनको कार्यक्रममा मुख्य अतिथिको रूपमा सहभागी बने।
विधायक गोलेले सिक्किम विधानसभाका अध्यक्ष एमएन शेर्पालाई भव्य कार्यक्रम आयोजना गरेकोमा र निमन्त्रणा दिएकोमा कृतज्ञता व्यक्त गर्दै बधाई दिए। उनले शिक्षा र सामुदायिक विकासमा संस्थानको योगदानको सराहना गर्दै विद्यालय र यसका पूर्व छात्रहरूको उपलब्धिमाथि प्रकाश पारे। उनले महिलाहरूलाई शिक्षा प्रदान गर्नुको महत्त्वमा जोड दिॅंदै शिक्षाले उनीहरूलाई सशक्त बनाउँछ र राज्यको सामाजिक विकास भएर जान्छ भनी बताए।
विधायक गोलेले मानसिक स्वास्थ्यको बारेमा कुरा गर्दै सरकारको उच्च प्राथमिकताहरू मध्ये एक मानसिक स्वास्थ्य रहेको अवगत गराए। उनले यस संकटलाई सम्बोधन गर्न समाजको भूमिका महत्वपूर्ण रहेको बताए। उनले प्रत्येक व्यक्तिलाई अगाडि आउन र युवाहरूको लागि मानसिक स्वास्थ्य जागरूकता र समर्थन प्रणालीमा योगदान गर्न आग्रह गरे।
उनले डिजिटल आइसोलेसनलाई डिप्रेसन र मनोवैज्ञानिक पीडाका प्रमुख कारणहरू मध्ये एक रहेको बताए। उनले राज्य सरकार र जिल्ला प्रशासनले यस गम्भीर समस्यालाई सम्बोधन गर्न ग्रामीण र शहरी दुवै क्षेत्रहरूमा जागरूकता अभियान शुरु गर्ने जानकारी गराए। यो अभियान मानसिक स्वास्थ्य जागरूकता, जिम्मेवार डिजिटल प्रयोग र युवा व्यक्तिहरूको लागि सहयोग संयन्त्रमा केन्द्रित हुने उनले बताए।
हिन्दुस्थान समाचार / बिशाल
