काबुल, 08 मई (हि.स.)। पाकिस्तान र भारतबीचको हालैको तनावले अफगानिस्तानको व्यापारमा चुनौती खडा गरेको छ। अफगानिस्तानबाट हुने निर्यात ढुवानी बन्दरगाहहरूमा रोकिएको छ। चेम्बर अफ कमर्स एण्ड इन्भेस्टमेन्टले यो अवस्थाले अफगानिस्तानको अर्थतन्त्रमा थप दबाउ बढेको बताएको छ।

टोलो न्यूजका अनुसार, चेम्बर अफ कमर्स एण्ड इन्भेस्टमेन्टका बोर्ड सदस्य खान जान अलोकोजयले यो अवस्था अफगानिस्तानको लागि हानिकारक रहेको बताए। सीमित आपूर्ति र उच्च मागका कारण भारतमा अफगानी सामान महँगो भएको छ। भारतका मानिसहरूलाई अफगानिस्तानबाट आउने ताजा र सुकेका फलफूल मन पर्छ। दुई देशबीचको तनाव अफगानिस्तानको लागि गम्भीर मुद्दा हो।

बोर्ड सदस्यले पाकिस्तान र भारत सरकारलाई पारगमन र व्यापारका मुद्दाहरूलाई राजनीतिक र सुरक्षा मामिलाहरूबाट अलग गर्न आह्वान गरेका छन्। अर्थ मन्त्रालयले भारत-पाकिस्तान तनावको प्रत्यक्ष प्रभाव अफगानिस्तानको अर्थतन्त्रमा पर्ने बारेमा पनि चिन्ता व्यक्त गरेको छ। उप वित्त मन्त्री अब्दुल लतीफ नाजारीले भारत-पाकिस्तान सम्बन्धमा तनावले अफगानिस्तानको आर्थिक अवस्थामा नकारात्मक प्रभाव पारेको बताए। अफगानिस्तानको अत्यावश्यक सामानहरू वाघा सीमाबाट आयात हुॅंदै आएको छ। बढ्दो तनावसँगै यो प्रक्रियाले निस्सन्देह अफगानिस्तानको आयात र निर्यातमा गम्भीर क्षति पुर्‍याउन सक्छ।

यसैबीच, केही विज्ञहरूले भारतसँग व्यापार जारी राख्न अफगानिस्तानले इरानको चाबहार बन्दरगाहको बढी प्रयोग गर्न सक्ने सुझाउ दिएका छन्। आर्थिक विज्ञ मीर शकर याकुबीले क्षेत्रीय तनावको अवस्थालाई ध्यानमा राख्दै वाघाको विकल्पको रूपमा चाबहार बन्दरगाह प्रयोग गर्न अनुकूल अवस्था रहेको बताए। यस बन्दरगाह मार्फत व्यापार उल्लेखनीय रूपमा बढाउन सकिन्छ। अफगानिस्तानको अन्तरिम सरकारले दुई देशबीच वार्ताको लागि आह्वान गरेको छ।

हिन्दुस्थान समाचार / भवानी थामी