नयाँ दिल्ली, ११ जनवरी (हि.स.)। प्रधानमन्त्री नरेन्द्र मोदीले आइतबार भारतका युवाहरूले विकसित भारत निर्माण गर्दै आफ्ना सांस्कृतिक जरालाई पनि सुदृढ़ बनाइरहेको बताएका छन्। उनले यो कुरा आज भिडियो सन्देशमार्फत श्रीमद् विजयरत्न सुन्दर सूरीश्वरजी महाराजको ५००औँ पुस्तक विमोचन समारोहलाई सम्बोधन गर्दै भनेका हुन्। उक्त पुस्तकको विषय “प्रेमनु विश्व, विश्वनो प्रेम” रहेको छ।

भिडियो सन्देशमा प्रधानमन्त्री मोदीले भने, “भारत आज विश्वका सबैभन्दा युवा राष्ट्रहरूमध्ये एक हो, जहाँका युवाहरू विकसित भारत निर्माणमा जुटिरहेका छन् र आफ्ना सांस्कृतिक जरालाई पनि सशक्त बनाइरहेका छन्। यस सकारात्मक परिवर्तनमा महाराज साहेबजस्ता सन्तहरूको मार्गदर्शन र साहित्यले महत्वपूर्ण भूमिका निर्वाह गरिरहेको छ।”

उनले यो पुस्तक केवल एउटा कृति मात्र नभई प्रेमको शक्तिको परिचायक मन्त्र भएको उल्लेख गरे। विशेष गरी आजको समयमा, जब विश्व विभाजन र द्वन्द्वबाट गुज्रिरहेको छ, तब यस्तो सन्देश बोकेको पुस्तकको आवश्यकता पहिलेभन्दा अझ बढी भएको उनको भनाइ छ।

प्रधानमन्त्री मोदीले जैन दर्शनको मार्गदर्शक सिद्धान्त “परस्परोपग्रहो जीवनम्” को उल्लेख गर्दै यसको अर्थ प्रत्येक जीवन एक–अर्कासँग गहिरो रूपमा जोडिएको हुन्छ भन्ने स्पष्ट पारे। उनले भने, यस सिद्धान्तलाई आत्मसात् गर्दा हाम्रो दृष्टिकोण व्यक्तिबाट सामूहिक हिततर्फ मोडिन्छ र हामी व्यक्तिगत आकांक्षाभन्दा माथि उठेर समाज, राष्ट्र तथा सम्पूर्ण मानवताको लक्ष्यतर्फ सोच्न थाल्छौँ। उनले महाराज साहेबका ५०० रचनाहरूलाई विचाररत्नले भरिएको विशाल महासागरको संज्ञा दिँदै ती कृतिहरूले मानवताको समस्याहरूका सरल र आध्यात्मिक समाधान प्रस्तुत गर्ने बताए।

यस अवसरमा प्रधानमन्त्री मोदीले नवकार मन्त्र दिवसको ऐतिहासिक अवसरमा लिइएका नौ संकल्पहरू पुनः स्मरण गराए, जुन राष्ट्र र समाजको उत्थानका लागि आवश्यक रहेको उनले बताए। ती संकल्पहरूमा जल संरक्षण, “एक रुख आमाको नाम” मा रोप्ने अभियान, स्वच्छता अभियानलाई अघि बढाउने, स्थानीय उत्पादनहरूको प्रवर्द्धन, भारत दर्शनलाई प्रोत्साहन, प्राकृतिक खेती अपनाउने, स्वस्थ जीवनशैलीको अभ्यास, योग तथा खेललाई जीवनको हिस्सा बनाउने र गरिब तथा पीडितहरूको सहयोग गर्ने प्रतिबद्धता समावेश छन्।

---------------

हिन्दुस्थान समाचार / भवानी थामी