गान्तोक, 14 जनवरी (हि.स.)। सीमा सड़क संगठनका महानिर्देशक (डीजीबीआर) लेफ्टिनेन्ट जनरल हरपाल सिंहले सिक्किममा 2023 मा हिमनदी ताल फुटेर आएको बाढी (जीएलओएफ) पछि गरिएका सड़क पूर्वाधार पुनर्स्थापना र लचिलोपन उपायहरूको स्थिति समीक्षा गर्न सिक्किमको भ्रमण गरेका छन्। भ्रमणको क्रममा उनले त्रिशक्ति कोर्प्सका जीओसी लेफ्टिनेन्ट जनरल मनराज सिंह मानसँग अन्तरक्रिया गरे। यसैगरी, उनले दीर्घकालीन कनेक्टिभिटी र प्रकोप लचिलोपनका लागि समन्वयित नागरिक-सैन्य प्रयासहरू सुनिश्चित गर्न सिक्किम सरकारका मुख्य सचिव रविन्द्र तेलाङसॅंग पनि भेट गरे। उक्त जानकारी आज रक्षा पीआरओले एक प्रेस विज्ञप्तिमा दिएको छ।

डीजीबीआर सिंहले बाढीबाट क्षतिग्रस्त सड़कहरूको पुनर्स्थापना र स्तरोन्नति, कमजोर खण्डहरूको सुदृढीकरण, ढलान स्थिरीकरण, जल निकासी सुधार तथा सिक्किमको नाजुक र उच्च-उचाई भूभागमा भरपर्दो सबै मौसमी कनेक्टिभिटी सुनिश्चित गर्न सुरक्षात्मक कार्यहरू बारे छलफल गरे। छलफलका क्रममा भविष्यमा हुने चरम मौसमी घटनाहरूको प्रभावलाई कम गर्न जलवायु-लचिलोपन पूर्वाधार समाधानहरू अपनाउने कुरामा जोड दिइएको बताइएको छ।

विज्ञप्तिमा उल्लेख गरिएअनुसार, जीएलओएफ २०२३ पछि त्रिशक्ति कोर्प्स अन्तर्गत भारतीय सेनाले नागरिक अधिकारीहरूलाई सहयोग गर्न द्रुत गतिमा कारबाही गरेको थियो। चुनौतीपूर्ण भूभाग र मौसमी अवस्थाहरूमा उद्धार सहायता, चिकित्सा सहायता, भग्नावशेष हटाउने र महत्वपूर्ण सड़क सम्पर्कहरू पुन: खोल्न, दुर्गम र सम्पर्कविहीन क्षेत्रहरूमा पहुँच पुनर्स्थापित गर्न सेना संरचनाहरू तैनाथ गरिएको थियो। अभियन्ता स्रोतहरूले आवश्यक आपूर्ति र सेवाहरूको आवागमन कायम राख्न अस्थायी कनेक्टिभिटी समाधानहरू सुनिश्चित गरे।

त्रिशक्ति कोर्प्सले प्रभावित क्षेत्रहरूमा दिगो रसद सहयोग, चिकित्सा सहायता र सामुदायिक पहुँचका साथै पूर्वाधार सुदृढीकरण, वैकल्पिक मार्ग र आपदा न्यूनीकरण उपायहरूलाई प्राथमिकता दिन सीमा सड़क संगठन र सिक्किम सरकारसँग समन्वय जारी राखेको छ।

यस भ्रमणले सिक्किमका जनताको समर्थनमा बलियो नागरिक-सैन्य तालमेललाई सुदृढ पार्दै राष्ट्र निर्माण, आपदा तयारी र लचिलो पूर्वाधार विकासप्रति भारतीय सेनाको सामूहिक प्रतिबद्धतालाई पुन: पुष्टि गरेको विज्ञप्तिमा बताइएको छ।

हिन्दुस्थान समाचार / बिशाल