गान्तोक, 0१ अक्टोबर (हि.स.)। सिक्किम राज्य आपदा प्रबन्धन प्राधिकरण (एसएसडीएमए) ले गान्तोक जिल्ला आपदा प्रबन्धन प्राधिकरण (डीडीएमए) को समन्वयमा आयोजना गर्न लागेको भूकम्प, पैह्रो तथा हिमताल विस्फोटजन्य बाढी (जीएलओएफ) सम्बन्धी राज्यस्तरीय मक ड्रिलका लागि आज गान्तोकस्थित जिल्ला प्रशासनिक केन्द्र (डीएसी) को सम्मेलन कक्षमा प्रारम्भिक बैठक आयोजना गरियो।

बैठकलाई सम्बोधन गर्दै गान्तोक मुख्यालयका अतिरिक्त जिल्ला अधिकारी (एडीसी) छिरिङ नोर्ग्याल थिङले राज्यका विभिन्न विभागको सहभागितामा आयोजना हुने राज्यस्तरीय मक ड्रिल महत्वपूर्ण वार्षिक अभ्यास रहेको बताए। उनले यो केवल नियमित अभ्यास मात्र नभई वास्तविक आपदाको अवस्थामा तयारीको मूल्याङ्कन तथा प्रतिकार्य संयन्त्रलाई सुदृढ गर्ने अवसर रहेको उल्लेख गरे। उनले घटना प्रतिकार्य प्रणालीअन्तर्गत प्रत्येक विभागले आफ्नो भूमिका, जिम्मेवारी तथा समन्वय संयन्त्रबारे स्पष्ट जानकारी राख्नुपर्नेमा जोड दिए।

गान्तोक डीडीएमएका उपनिर्देशक बिजयता खरेलले विभिन्न विभागले अपनाउनुपर्ने तयारीका उपाय, अन्तरविभागीय समन्वय, जनशक्ति तथा स्रोतसाधन परिचालन, सञ्चार तथा प्रतिकार्य संयन्त्र र अभ्यासका क्रममा पालना गर्नुपर्ने गतिविधिको क्रमबारे छलफलको नेतृत्व गरिन्।

सम्बन्धित विभाग तथा निकायलाई अभ्यासको समग्र सञ्चालन, उनीहरूको भूमिका तथा जिम्मेवारीबारे आवश्यक निर्देशन र मार्गदर्शन प्रदान गर्ने उद्देश्यले बैठक आयोजना गरिएको थियो। सम्बन्धित विभागका प्रतिनिधिहरूलाई अभ्यासको कार्यविधि तथा काल्पनिक आपदा परिदृश्यका क्रममा निर्वाह गर्नुपर्ने विशेष जिम्मेवारीबारे जानकारी गराइयो।

हिन्दुस्थान समाचार / बिशाल