गान्तोक, 0१ अक्टोबर (हि.स.)। विश्व ज्येष्ठ नागरिक दिवसको अवसरमा सिक्किम सरकारको आयुष विभागअन्तर्गत १० बेडेड आयुष अस्पतालले आसाम लिङ्जेअन्तर्गत मायाल्मु आश्रयगृहमा स्वास्थ्य सचेतना तथा परीक्षण शिविर आयोजना गरेको छ। ज्येष्ठ नागरिकमा स्वास्थ्य, कल्याण तथा रोगको रोकथामसम्बन्धी स्वास्थ्य सेवाबारे जागरुकता बढाउने उद्देश्यले शिविर आयोजना गरिएको हो।

शिविरमा आयुषका चिकित्सा अधिकारी डा. सिद्धार्थ शर्मा तथा आयुषकी नर्स प्रसन्ना गुरुङले स्वास्थ्य परीक्षण गरेका थिए। शिविरमा सहभागी ज्येष्ठ नागरिकहरूको रक्तचाप मापन तथा आकस्मिक रक्तशर्करा परीक्षणलगायत आधारभूत स्वास्थ्य परीक्षण गरिएको थियो।

सहभागीहरूलाई सामान्य स्वास्थ्य तथा खानपानसम्बन्धी परामर्शसमेत दिइएको थियो। स्वस्थ खानपान, जीवनशैली तथा वृद्धावस्थामा समग्र शारीरिक र मानसिक स्वास्थ्य कायम राख्न अपनाउनुपर्ने उपायबारे जानकारी दिइएको थियो।

कार्यक्रममा कुल २७ जना वयस्क सहभागी भएका थिए। स्वास्थ्य परीक्षण तथा सचेतना कार्यक्रमपछि सामाजिक सहभागिता र भावनात्मक स्वास्थ्यलाई प्रोत्साहन गर्ने उद्देश्यले अन्तरक्रियात्मक तथा मनोरञ्जनात्मक कार्यक्रम आयोजना गरिएको थियो। सहभागीहरूले संगीत र नृत्यसहितको कार्यक्रममा सक्रिय सहभागिता जनाउँदै आश्रयगृहमा खुशी र सकारात्मक वातावरण सिर्जना गरेका थिए। आयुष विभागले समुदायमा स्वस्थ तथा सम्मानजनक वृद्धावस्थालाई सहयोग गर्ने उद्देश्यले समग्र र रोगको रोकथाममा आधारित स्वास्थ्य सेवाको अवधारणालाई निरन्तर प्राथमिकता दिँदै आएको छ।

हिन्दुस्थान समाचार / बिशाल