मंगन, 0१ अक्टोबर (हि.स.)। मंगनस्थित खण्ड प्रशासनिक केन्द्र (बीएसी) परिसरमा आज ‘एक दिन, एक घण्टा, एक साथ’ नाराअन्तर्गत एकदिने स्वैच्छिक श्रमदान कार्यक्रमसँगै ‘एक पेड मॉं के नाम’ वृक्षरोपण अभियान सञ्चालन गरियो। कार्यक्रम ग्रामीण विकास विभागअन्तर्गत सिक्किम ग्रामीण जीविकोपार्जन अभियान (एसआरएलएम), मंगन खण्डको खण्ड विकास समाज (बीडीएस) ले आयोजना गरेको हो।
कार्यक्रमको उद्देश्य समुदायको सहभागिता बढाउनुका साथै सरसफाई, पर्यावरण संरक्षण तथा स्वच्छ र हराभरा वातावरण निर्माणका लागि सामूहिक जिम्मेवारीको भावना प्रवर्द्धन गर्नु रहेको थियो।
कार्यक्रममा मंगन खण्डअन्तर्गतका स्वयं सहायता समूह (एसएचजी) का सदस्यहरूले सक्रिय सहभागिता जनाए। कार्यक्रममा मंगनका खण्ड विकास अधिकारी (बीडीओ) कैलाश थापाको उपस्थिति रहेको थियो। एसआरएलएम, मंगनका खण्ड कार्यक्रम प्रबन्धक (बीपीएम), सहायक कार्यक्रम प्रबन्धक (एपीएम) तथा व्यवस्थापन सूचना प्रणाली (एमआईएस) का कर्मचारीहरू र स्वयं सहायता समूहका सदस्यहरूले गतिविधिको नेतृत्व गरेका थिए।
सरसफाइ अभियानमा मंगनका नगरपालिका कार्यकारी अधिकारी (एमईओ) कारजोङ भोटियाले महत्वपूर्ण सहयोग गरे। उनले नगरपालिकाको फोहोर संकलन गर्ने सवारीसाधनमार्फत फोहोर उठाउने तथा व्यवस्थापनको व्यवस्था मिलाउनुका साथै कार्यक्रममा प्रयोगका लागि फोहोरका झोलासमेत उपलब्ध गराए। उनको सहयोगले श्रमदान कार्यक्रमलाई व्यवस्थित र प्रभावकारी रूपमा सञ्चालन गर्न मद्दत पुगेको थियो।
सरसफाइ अभियानपछि ‘एक पेड मॉं के नाम’ अभियानअन्तर्गत वृक्षरोपण कार्यक्रम सञ्चालन गरियो। सहभागीहरूले निर्धारित परिसरमा विभिन्न बिरुवा रोपे। यस पहलले पर्यावरणीय दिगोपनको महत्व उजागर गर्नुका साथै प्राकृतिक वातावरणको संरक्षण तथा संवर्द्धनमा समुदायलाई योगदान गर्न प्रोत्साहित गरेको छ।
हिन्दुस्थान समाचार / बिशाल
01 Oct 2026
