कोलकाता, 0१ अक्टोबर (हि.स.)। राष्ट्रिय स्वैच्छिक रक्तदान दिवसका अवसरमा राज्य रक्तसञ्चार परिषद्को आयोजनामा बिहिवार स्वास्थ्य भवनमा विशेष कार्यक्रम सम्पन्न भयो। कार्यक्रममा उपस्थित स्वास्थ्य तथा परिवार कल्याण मन्त्री शारद्वत मुखोपाध्यायले रक्तदान गर्ने वा रगत आवश्यक पर्ने अवस्थामा दाताको जाति, धर्म वा राजनीतिक पहिचान नदेखिने, मानव पहिचान मात्र महत्त्वपूर्ण हुने बताए।

उनले रक्तदातालाई आफ्नो रगतले कसको जीवन बचाउँछ भन्ने थाहा नहुने बताए। त्यही रगत आमाबुबा, हजुरबुबा–हजुरआमा वा बालबालिकाका लागि जीवनरक्षक बन्नसक्ने उनको भनाइ थियो। नियमित स्वैच्छिक रक्तदानका लागि अपील गर्दै उनले स्वस्थ व्यक्तिले दिएको रगत निश्चित समयपछि शरीरले पुनः उत्पादन गर्ने भएकाले रक्तदानको महत्त्व अन्य धेरै प्रकारका दानभन्दा फरक रहेको बताए।

स्वास्थ्य तथा परिवार कल्याण मन्त्रीले स्वास्थ्य विभागका कर्मचारी, एनसीसी क्याडेट लगायत नियमित रक्तदाताहरूको योगदानको प्रशंसा गरे। उनले कानुन अनुसार, रक्तदान सुनिश्चित गर्नुपर्नेमा पनि जोड दिए। एउटा निजी रक्त ब्यांकको उदाहरण दिँदै उनले प्रलोभनमा पारेर १३ वर्षीय बालकबाट रगत निकालिएको घटना उल्लेख गरे। यस्ता अनियमितता विरुद्ध सतर्क रहन उनले आग्रह गरे।

कार्यक्रममा सयभन्दा बढ़ी पटक रक्तदान गरेका धेरै रक्तदातालाई सम्मान गरियो। स्वास्थ्य भवनमा स्वैच्छिक रक्तदान शिविर समेत आयोजना गरियो। कार्यक्रममा स्वास्थ्यका प्रमुख सचिव नारायण स्वरूप निगम, डा. इन्द्रजित साहा, डा. स्वपन सोरेन, डा. निताइचन्द्र मण्डल, डा. विजयप्रसाद मुखोपाध्याय लगायत विभागीय अधिकारी तथा एनसीसी क्याडेटहरूको उपस्थिति थियो।

‘वन्दे मातरम्’ गायन र दीप प्रज्वलनसँगै कार्यक्रम शुरु भयो। डा. स्वपन सोरेनले सर्वसाधारणलाई स्वेच्छाले रक्तदान गर्न अपील गरे। राष्ट्रगानसँगै कार्यक्रम समापन भयो।

हिन्दुस्थान समाचार / भवानी थामी