सोरेङ, 0१ अक्टोबर (हि.स.)। मुख्यमन्त्री प्रेमसिंह तामाङले आज सोरेङ जिल्लाको रेसीस्थित डाक बंगलामा आयोजित बैठकमा रंगीत चरण-IV जलविद्युत् परियोजनाको वर्तमान अवस्था तथा प्रगतिको समीक्षा गरेका छन्।

बैठकका क्रममा मुख्यमन्त्री तामाङले परियोजनाअन्तर्गत भइरहेका निर्माण कार्यको प्रगति तथा कार्यान्वयनसँग सम्बन्धित विभिन्न विषयबारे जानकारी लिए। उनले जनताको सुविधा र कल्याणलाई ध्यानमा राख्दै परियोजनाको कार्यान्वयन प्रभावकारी रूपमा सुनिश्चित गर्न एनएचपीसीका अधिकारीहरूलाई निर्देशन दिए। उनले सुरुङभित्र पर्याप्त प्रकाशको व्यवस्था, पैदल यात्रुका लागि सहज तथा सार्वजनिक आवागमनका लागि सुरक्षित बनाउनुपर्ने विषयमा पनि विस्तृत छलफल गरे।

मुख्यमन्त्रीले परियोजनासँग सम्बन्धित विषयको अध्ययन गर्न राज्य सरकारको खानी तथा भूविज्ञान विभागका अधिकारी तथा सम्बन्धित जिल्लाका जिल्ला अधिकारीहरू सम्मिलित समिति गठन गरिने जानकारी दिए। उनले राज्यभर भइरहेका परियोजनाको सहज कार्यान्वयन तथा अनुगमनका लागि एनएचपीसी र प्रस्तावित समितिबीच निकट समन्वय कायम गर्न पनि निर्देशन दिए।

बैठकमा एनएचपीसीका डीजीएम-एचआरटी आरएम साहोले रङ्गीत चरण-IV जलविद्युत् परियोजनाको वर्तमान अवस्थाबारे विस्तृत प्रस्तुतीकरण गरे। प्रस्तुतीकरणमा बाँध नियन्त्रण कक्ष भवन, डिसिपेटिङ चेम्बर तथा सेल्फ-फ्लस सुरुङ, हेड रेस सुरुङ, सर्ज साफ्ट, पावर हाउस, टेल रेस च्यानल, पोटहेड यार्डका कार्य तथा रेसीस्थित बाँध क्षेत्रनजिक एसएच-२२/एनएच-५१० अन्तर्गतको डाइभर्सन रोड सुरुङको अवस्थाबारे जानकारी दिइयो।

प्रस्तुतीकरणमा पुनर्स्थापना तथा सुधारात्मक उपचारका लागि गरिएका सिफारिस, ठूला निर्माण उपकरणको आवश्यकता तथा चुन भट्टी नाला क्षेत्रमा देखिएको पहिरो क्षेत्रको अवस्थाबारे पनि जानकारी दिइएको थियो।

बैठकमा सिक्किम विधानसभा अध्यक्ष एमएन शेर्पा, सडक तथा पुल विभागका मन्त्री एनबी दाहाल, भवन तथा आवास विभागका मन्त्री भीमहाङ लिम्बू, मुख्यमन्त्रीका राजनीतिक सचिवलगायत सम्बन्धित अधिकारीहरूको उपस्थिति थियो।

हिन्दुस्थान समाचार / बिशाल