कोलकाता, 0१ अक्टोबर (हि.स.)। पश्चिम बंगालका पूर्वमन्त्री इन्द्रनील सेनलाई दुर्गा पूजाका नक्कली पास बिक्रीसँग जोडिएको करोडौँ रुपियाँको घोटाला प्रकरणमा प्रवर्तन निर्देशनालय (ईडी) ले पुनः समन पठाएको छ। केद्रिय अनुसन्धान एजेन्सीले बुधबार साल्टलेकस्थित सीजीओ कम्प्लेक्समा उनीसँग करिब साढे नौ घण्टासम्म लामो सोधपुछ गरेको थियो।

बुधबार बिहान करिब ११ बजी ईडी कार्यालय पुगेका पूर्वमन्त्री राति साढे ८ बजीपछि त्यहाँबाट बाहिरिएका थिए। कार्यालय प्रवेश गर्ने वा बाहिरिने क्रममा उनले सञ्चारमाध्यमका कुनै पनि प्रश्नको जवाफ दिएनन्।

यसअघि अनुसन्धान तीव्र बनाउँदै ईडीका अधिकारीहरूले मंगलबार इन्द्रनीलको कस्बास्थित निवास, हुग्लीको सिंगुरस्थित फार्महाउस तथा उनका केही निकट सहयोगीका ठेगानामा व्यापक छापामारी गरेका थिए। जॉंच कर्ताहरूको प्रारम्भिक अनुमानअनुसार दुर्गा पूजा दर्शनका लागि नक्कली पास बिक्री गरेर करिब ५० देखि ६० करोड रुपियाँ अवैध रूपमा असुली गरी ठूलो भ्रष्टाचार गरिएको छ।

यस ठूलो घोटाला प्रकरणमा इन्द्रनील सेन मात्र नभई उनकी पत्नी मधुछन्दा सेन पनि मुख्य आरोपको घेरामा छन्। जयदीप मुखर्जी नामका एक व्यक्तिले पुलिसमा दर्ता गराएको उजुरीअनुसार पूर्वमन्त्री र उनकी पत्नीले दुर्गा पूजाको ‘प्रिभ्यु शो’ तथा ‘प्रिभिलेज्ड पूजा इन्ट्री’ टिकट बिक्रीका नाममा अवैध कारोबार सञ्चालन गरेका थिए। उनीहरूले यस व्यावसायिक गतिविधिलाई युनेस्कोको प्रत्यक्ष समर्थन र स्वीकृति प्राप्त रहेको भन्दै सर्वसाधारणमाझ भ्रामक प्रचार गरेको आरोप छ।

उजुरीकर्ता जयदीप मुखर्जीको दाबीअनुसार वास्तविकतामा युनेस्कोले यस्तो कुनै व्यावसायिक सम्झौता वा साझेदारीलाई स्वीकृति दिएको थिएन र मानिसहरूलाई भ्रममा पारेर ठूलो रकम असुली गरिएको थियो। उनले यो सम्पूर्ण ठगीका लागि पूर्वमन्त्रीकी पत्नी ‘मास आर्ट’ नामक निजी संस्थासँग आबद्ध रहेको पनि दाबी गरेका छन्। सन् २०२१ मा कोलकाताको ऐतिहासिक दुर्गा पूजाले युनेस्कोबाट प्रतिष्ठित मान्यता पाएलगत्तै यो संस्था स्थापना गरिएको बताइएको छ।

यही संस्थामार्फत ठूलो परिमाणमा नक्कली पास बिक्री गर्ने कारोबार सञ्चालन गरिएको आरोप छ। केन्द्रिय अनुसन्धान एजेन्सीले हाल यी सबै आरोपलाई गम्भीरतापूर्वक लिँदै भ्रष्टाचारको सम्पूर्ण सञ्जालबारे अनुसन्धान गरिरहेको छ।

हिन्दुस्थान समाचार / बिशाल