नयाँ दिल्ली, २० अक्टोबर (हि.स.)। प्रधानमन्त्री नरेन्द्र मोदी र केन्द्रिय गृह तथा सहकारितामन्त्री अमित शाहले मङ्गलबार राष्ट्रिय स्वयंसेवक सङ्घ (आरएसएस) को स्थापना दिवसका अवसरमा सङ्घका सम्पूर्ण स्वयंसेवकहरूलाई बधाई तथा शुभकामना दिएका छन्।
प्रधानमन्त्री मोदीले सामाजिक सञ्जाल ‘एक्स’ मार्फत सङ्घलाई आफ्नो अथक परिश्रम र सेवाभावद्वारा सिँच्ने तथा विकसित गर्ने सबै महान् व्यक्तित्वहरूप्रति नमन गरेका छन्।
उनले सङ्घले सेवा, राष्ट्र निर्माण र सामाजिक प्रतिबद्धताको गौरवशाली शताब्दी वर्ष पूरा गरेको उल्लेख गरेका छन्। असङ्ख्य स्वयंसेवकहरूले आफ्नो समर्पण, कर्तव्यनिष्ठा र राष्ट्रलाई सर्वोपरी राख्ने भावनाका साथ समाजको उत्थानका लागि निरन्तर काम गरेको उनले बताएका छन्। आगामी दिनमा पनि यही भावनाले देशलाई अझ सशक्त र सुदृढ बनाउने विश्वास उनले व्यक्त गरेका छन्।
प्रधानमन्त्री मोदीले नागपुरमा आयोजित शताब्दी वर्षको विजयादशमी उत्सवका क्रममा सरसङ्घचालक डा. मोहन भागवतले दिएको सम्बोधनलाई प्रेरणादायी बताएका छन्। भागवतले राष्ट्रिय प्रगति, सामाजिक एकता, आत्मनिर्भरताको आवश्यकता र समाजको चरित्र सुदृढ बनाउनेजस्ता महत्त्वपूर्ण विषयमा विस्तृत चर्चा गरेको उनले उल्लेख गरेका छन्।
विशेषगरी सेवा र राष्ट्र निर्माणप्रतिको प्रतिबद्धतामा भागवतले दिएको जोड उल्लेखनीय रहेको प्रधानमन्त्रीले बताएका छन्। यो प्रतिबद्धता प्रत्येक सङ्घ स्वयंसेवकको जीवनको अभिन्न अङ्ग भएको उल्लेख गर्दै उनले ‘पञ्च परिवर्तन’ का विषयमा पनि चर्चा गरेका छन्। यी पाँच सूत्रले समाजमा सकारात्मक परिवर्तन ल्याउन महत्त्वपूर्ण योगदान दिन सक्ने उनको भनाइ छ।
केन्द्रिय गृहमन्त्री अमित शाहले सङ्घ भारतीय संस्कृतिका जरा सुदृढ बनाउने, समाजमा देशभक्तिको भावना जागृत गर्ने र युवाहरूलाई राष्ट्र निर्माणसँग जोड्ने महत्त्वपूर्ण कार्यमा जुटेको बताएका छन्।
देशभर सङ्घका स्वयंसेवकहरूले गरिरहेका सेवामूलक कार्यहरूले सशक्त, समृद्ध र आत्मनिर्भर भारत निर्माणको सङ्कल्पलाई निरन्तर मजबुत बनाइरहेको उनले उल्लेख गरेका छन्। सेवा, मूल्य र देशभक्तिको यो अविरल धाराले आगामी पुस्ताको हृदयमा पनि मातृभूमिप्रतिको प्रेमको अखण्ड ज्योति युगौँसम्म प्रज्वलित राख्ने विश्वास उनले व्यक्त गरेका छन्।
उल्लेखनीय छ, आरएसएसले आज विजयादशमीको अवसरमा नागपुरस्थित रेशिमबाग मैदानमा आफ्नो १०१औँ स्थापना दिवस मनाएको छ। यस अवसरमा सङ्घ प्रमुख डा. मोहन भागवतले परम्परागत रूपमा हतियार र ढालको शस्त्रपूजा गरेको छ।
कार्यक्रममा सङ्घका संस्थापक डा. केशव बलिराम हेडगेवारप्रति पुष्पाञ्जली अर्पण गरियो। समारोहमा पूर्वउपराष्ट्रपति जगदीप धनखड र महाराष्ट्रका मुख्यमन्त्री देवेन्द्र फडणवीससहित विभिन्न विशिष्ट व्यक्तित्वहरूको उपस्थिति रहेको थियो। उनीहरूले राष्ट्रप्रतिको सेवाभावका लागि स्वयंसेवकहरूको प्रशंसा गरेका थिए।
हिन्दुस्थान समाचार / भवानी थामी
