गान्तोक, 03 अक्टोबर (हि.स.)। राजभाषा हिन्दीको प्रचार-प्रसार तथा कार्यालयीन कार्यमा यसको सहज र अधिकतम प्रयोगलाई प्रोत्साहन गर्ने उद्देश्यले दक्षिण सिक्किमको रङ्गित पावर स्टेसनमा राजभाषा महापर्व २०२६ अन्तर्गत भव्य कवि सम्मेलन तथा राजभाषा संगोष्ठी आयोजना गरियो। साहित्य, संस्कृति र राजभाषा चेतनाको समन्वयमा आयोजित कार्यक्रममा पावर स्टेसनका अधिकारी तथा कर्मचारीहरूको उत्साहपूर्ण सहभागिता रहेको थियो।

कार्यक्रममा देशका विभिन्न स्थानबाट आएका साहित्यकार तथा कविहरूले आफ्ना रचनामार्फत साहित्यिक वातावरण निर्माण गरे। गेजिङका लक्ष्मी प्रसाद गुरुङ, गान्तोकका प्रवीण खालिङ तथा प्रा. इरफान अहमदले विशेष परिचर्चामा आफ्ना विचारहरू प्रस्तुत गरे। यसैगरी, दिल्लीका विनोद पाल, आसनसोलका बाँके बिहारी, हरियाणाका कुमार राघव तथा शिलाङकी डा. उमा पाण्डेयले कवितावाचन गरे।

कार्यक्रमको शुरुआत रङ्गित पावर स्टेसनका प्रमुख प्रभारी रश्मि रञ्जन मल्लिकको स्वागत सम्बोधनबाट भएको थियो। उनले हिन्दी केवल कार्यालयीन सञ्चारको माध्यम नभई भारतको भाषिक विविधताबीच संवाद र विचार आदान-प्रदानको प्रभावकारी माध्यम रहेको बताए।

कविहरूले हास्य, व्यङ्ग्य, सामाजिक सरोकार, मानवीय संवेदना तथा समकालीन जीवनसँग सम्बन्धित विषयमा कविता प्रस्तुत गरे। कवितावाचनका क्रममा सभाहलमा कहिले हाँसो र ताली गुञ्जियो भने कहिले संवेदनशील प्रस्तुतिले श्रोताहरूलाई भावुक बनायो।

कार्यक्रमको प्रमुख आकर्षण लक्ष्मी प्रसाद गुरुङ, प्रवीण खालिङ र प्रा. इरफान अहमदसँग आयोजित विशेष परिचर्चा रह्यो। परिचर्चामा राजभाषा हिन्दीको व्यावहारिक प्रयोग, कार्यालयीन कार्यमा हिन्दीको भूमिका, भाषाप्रतिको सकारात्मक दृष्टिकोण तथा बदलिँदो सामाजिक र प्राविधिक परिवेशमा हिन्दीको प्रासंगिकताबारे विचार-विमर्श गरियो।

वक्ताहरूले राजभाषाको सशक्तीकरण केवल नियम र औपचारिक लक्ष्यबाट सम्भव नहुने उल्लेख गर्दै भाषाप्रति आत्मीयता विकास गर्नुका साथै दैनिक कार्यसंस्कृतिमा हिन्दीको स्वाभाविक प्रयोग बढाउनुपर्नेमा जोड दिए। हिन्दीलाई केवल कार्यालयीन आवश्यकताका रूपमा नभई संवाद र अभिव्यक्तिको सहज माध्यमका रूपमा विकास गर्नुपर्ने धारणा पनि व्यक्त गरियो।

जीएसएम (एचआर) पाण्डु गगराईको नेतृत्वमा आयोजित कार्यक्रममा मानव संसाधन टोलीले योजना तथा कार्यान्वयनमा महत्वपूर्ण भूमिका निर्वाह गरेको थियो। समापन अवसरमा डा. चन्द्रकान्त पाण्डेयले धन्यवाद ज्ञापन गर्दै अतिथि, साहित्यकार, कवि तथा सहभागी सबैप्रति आभार व्यक्त गरे।

हिन्दुस्थान समाचार / बिशाल