नोएडा, ३० अक्टोबर (हि.स.)। राज्यसभाका पूर्व सदस्य, भाजपाका वरिष्ठ नेता, समाजसेवी तथा देशका प्रसिद्ध उद्योगपति आरके सिन्हाको शुक्रवार नोएडाको सेक्टर ९२ स्थित निवासमा निधन भएको छ। शहरका विभिन्न वरिष्ठ नेता तथा समाजसेवीहरू उनलाई श्रद्धाञ्जली अर्पण गर्न उनको निवास पुगेका छन्। शुक्रवार नै उनको पार्थिव शरीर हवाई मार्गबाट पटना लगिँदैछ। उनको अन्त्येष्टि शनिवार गरिनेछ।

राज्यसभाका पूर्व सांसदकी सहयोगी रत्ना सिन्हाले आरके सिन्हालाई साल २०२५ को जनवरी महिनामा ब्रेन स्ट्रोक भएको जानकारी दिइन्। उनलाई उपचारका लागि सिङ्गापुर लगिएको थियो। त्यहाँ उपचारपछि उनी नोएडाको सेक्टर ९२ स्थित निवासमा बस्न थालेका थिए। सोही निवासमा शुक्रवार बिहान उनको निधन भयो।

उनले शुक्रवार साँझ ७ बजी उनको पार्थिव शरीर दिल्लीबाट पटना लगिने जानकारी दिइन्। शनिवार बिहान ९ बजीदेखि दिउँसो १२ बजीसम्म पटना स्थित पाटलिपुत्रको अन्नपूर्णा भवनमा अन्तिम दर्शनका लागि पार्थिव शरीर राखिनेछ। दिउँसो १२ बजी अन्नपूर्णा भवनबाट उनको अन्तिम यात्रा दीघा घाटका लागि प्रस्थान गर्नेछ।

बिहारको भोजपुर जिल्ला स्थित बहियारा गाउँका निवासी रविन्द्र किशोर सिन्हाको जन्म २२ सेप्टेम्बर १९५१ मा भएको थियो। डा. सिन्हा एसआईएस समूहका संस्थापक तथा अध्यक्ष थिए। राजनीतिका साथै उद्योग जगतमा पनि उनको विशिष्ट पहिचान थियो। भाजपाको प्रारम्भिक कालदेखि नै पार्टीसँग आबद्ध रहेका डा. सिन्हाले पार्टी तथा सङ्गठनका लागि लामो समयसम्म महत्त्वपूर्ण भूमिका निर्वाह गरेका थिए।

उनले आफ्नो करियरको शुरुआत पत्रकारिताबाट गरेका थिए। राजनीतिशास्त्र तथा कानूनको अध्ययन गरेका आरके सिन्हाको लेखनमा गहिरो रुचि थियो। पत्रकारिताका क्रममा उनले ‘जनआन्दोलन’ नामक पुस्तक लेखेका थिए। यस पुस्तकमा जयप्रकाश नारायणको नेतृत्वमा सञ्चालित विद्यार्थी आन्दोलनबारे विस्तृत रूपमा उल्लेख गरिएको थियो। साल २०१६ देखि २०२२ सम्म उनी हिन्दुस्थान समाचार समितिका अध्यक्ष रहेका थिए।

हिन्दुस्थान समाचार / भवानी थामी