तेहरान, 0४ अक्टोबर (हि.स.)। इरानको गुप्तचर निकायले करमन प्रान्तको सिर्जान जिल्लाबाट ३१ जना जासुसलाई पक्राउ गरेको छ। उनीहरू चारवटा अलग-अलग समूहमा विभाजित रहेको बताइएको छ। इस्लामिक रिपब्लिक अफ इरान ब्रोडकास्टिङको स्वामित्वमा रहेको प्रेस टीभीको रिपोर्टअनुसार, गुप्तचर मन्त्रालयले उनीहरूलाई अमेरिका र इजरायलको समर्थन रहेको आरोप लगाएको छ। उनीहरूको उद्देश्य शहरमा अशान्ति फैलाउनु र तोडफोड गर्नु रहेको बताइएको छ।
गुप्तचर मन्त्रालयका अनुसार, उनीहरूले किशोर तथा युवाहरूलाई आफ्नो जालमा पार्ने योजना बनाएका थिए। उनीहरूले ठूलो संख्यामा पेट्रोल बमसमेत तयार गरिसकेका थिए। ती पेट्रोल बम शहरका सीसीटीभी तथा क्यामेरामा क्षति पुर्याउन प्रयोग गर्ने योजना रहेको बताइएको छ। क्यामेरा निष्क्रिय बनाएर सडकमा अशान्ति फैलाउने तथा तोडफोड गर्ने तयारी उनीहरूले गरिरहेको आरोप लगाइएको छ।
उनीहरूमाथि जनवरीमा भएको प्रदर्शनका क्रममा हिंसा तथा तोडफोडमा संलग्न रहेको आरोपसमेत लगाइएको छ। ती प्रदर्शनमा हजारौँ मानिसको ज्यान गएको थियो। इरान सरकारले उनीहरू विदेशी शक्तिसँग जोडिएको आरोप लगाएको छ। प्रेस टीभीका अनुसार गुप्तचर मन्त्रालयले उनीहरूको सञ्जाल पूर्ण रूपमा ध्वस्त पारेको जनाएको छ। स्थानीय प्रशासनले थप कुनै घटना हुन नदिन क्षेत्रमा सुरक्षा व्यवस्था कडा बनाएको छ।
हिन्दुस्थान समाचार / बिशाल
04 Oct 2026
