नयाँ दिल्ली, ०५ अक्टोबर (हि.स.)। देशको सबैभन्दा ठूलो बजेट विमान सेवा कम्पनी इन्डिगोले विमान इन्धनको बढ्दो मूल्यलाई ध्यानमा राख्दै आन्तरिक तथा अन्तरराष्ट्रिय उडानका लागि इन्धन अधिभार बढाउने घोषणा गरेको छ। संशोधित शुल्क ६ अक्टोबरदेखि लागू हुनेछ, जसका कारण हवाई भाडा बढ्नेछ।
विमान कम्पनी इन्डिगोले सोमबार जारी गरेको जानकारीअनुसार, आन्तरिक उडानमा दूरीका आधारमा इन्धन अधिभार १०० देखि ३५० रुपियाँसम्म बढाइएको छ। अन्तरराष्ट्रिय उडानमा पनि इन्धन अधिभार वृद्धि गरिएको छ।
इन्डिगोका अनुसार, इन्धनको मूल्यमा निरन्तर वृद्धि भइरहेको छ र पछिल्लो समय मासिक आधारमै यसको मूल्यवृद्धि १४ प्रतिशतभन्दा बढी पुगेको छ। कम्पनीले विमानमा प्रयोग हुने इन्धन (एटीएफ) को लागत पछिल्लो एक दशककै उच्च स्तरमध्ये पुगेको जनाएको छ।
कम्पनीले विमान इन्धन विमान सेवा कम्पनीहरूको सञ्चालन खर्चको महत्वपूर्ण हिस्सा रहेको उल्लेख गरेको छ। एटीएफको मूल्यमा भएको वृद्धिले इन्डिगोसहित सबै विमान सेवा कम्पनीको लागत संरचना तथा उडान सञ्जालसँग सम्बन्धित आर्थिक अवस्थालाई प्रभावित गर्ने सम्भावना रहेको पनि कम्पनीले जनाएको छ।
हालको अवस्थालाई ध्यानमा राख्दै इन्डिगोले आफ्ना आन्तरिक तथा अन्तरराष्ट्रिय उडानमा इन्धन अधिभारमा सीमित वृद्धि गरेको जनाएको छ।
हिन्दुस्थान समाचार / बिशाल
