कोलकाता, 0५ अक्टोबर (हि.स.)। राज्यसभा सदस्यका लागि मनोनयनपत्र दाखिला गर्नुअघि बंगाली अभिनेत्री कोयल मल्लिक सोमवार बिहान औपचारिक रूपमा भारतीय जनता पार्टी (भाजपा) मा सामेल भएकी छन्। उनले सोमवार नै आफ्नो मनोनयनपत्र दाखिला गर्नेछिन्।

भाजपाको सदस्यता ग्रहण गरेपछि कोयलले भनिन्, “उच्च सदन (राज्यसभा) को सदस्य बन्ने अवसर पाएर आफूलाई धन्य महसुस गरिरहेकी छु। यो निकै ठूलो जिम्मेवारी हो। म सधैँ मानिसहरूको कल्याण र सेवाको धर्म पालना गर्दै आएकी छु। ठूलो राजनीतिक मञ्च प्राप्त भएपछि स्वाभाविक रूपमा जनसेवा गर्ने क्षमता पनि बढ्छ। मलाई उम्मेदवार बनाएकोमा प्रधानमन्त्री नरेन्द्र मोदी र शुभेन्दु अधिकारीलाई विशेष धन्यवाद दिन चाहन्छु।”

पश्चिम बंगालमा पछिल्ला केही महिनामा भएका विकास कार्यको प्रशंसा गर्दै कोयलले खुशी व्यक्त गरिन्। राज्यबाट प्रतिभा पलायन भइरहेकोप्रति चिन्ता व्यक्त गर्दै उनले भनिन्, “हाम्रा युवाहरूले राम्रो शिक्षा हासिल गरेपछि रोजगारीका लागि राज्यबाहिर जान्छन् र त्यहीँ बसोबास गर्न थाल्छन्, यो देख्दा निकै दुःख लाग्छ। यदि मैले यस दिशामा केही गर्न सकेँ र उनीहरूलाई रोक्न सफल भएँ भने आफूलाई भाग्यमानी ठान्नेछु। मेरो यही कामना छ कि बंगालका प्रत्येक व्यक्ति सुखी र समृद्ध रहून् तथा यहाँ रोजगारीका प्रशस्त अवसर सिर्जना होऊन्।”

उल्लेखनीय छ, कोयल मल्लिकले यसै वर्ष अप्रेलमा तृणमूल कांग्रेसकी सांसदका रूपमा शपथ लिएकी थिइन्। तर, ४ मईमा आएको विधानसभा चुनाउको परिणाममा तृणमूल कांग्रेस पराजित भएपछि राज्यको राजनीतिक समीकरणमा परिवर्तन आउन थाल्यो। यसै क्रममा कोयलले १६ जुलाईमा राज्यसभामा तृणमूल कांग्रेसकी सांसद पदबाट राजीनामा दिएकी थिइन्। राजीनामा दिएको केही समयपछि उनले दिल्लीका एक वरिष्ठ भाजपा नेतासँग भेट गरेको खबर समेत सार्वजनिक भएको थियो। त्यसपछि ४ अक्टोबरमा भाजपाले जारी गरेको राज्यसभा उम्मेदवारहरूको सूचीमा पश्चिम बंगालबाट कोयल मल्लिकलाई उम्मेदवार घोषणा गरियो।

आफ्नो पुरानो पार्टी तृणमूल कांग्रेसबारे सोधिएको प्रश्नमा कोयलले कुनै नकारात्मक टिप्पणी गर्न अस्वीकार गरिन्। उनले भनिन्, “दुवै दलका विचारधारा फरक छन् र प्रत्येक पार्टीले आफ्नो तरिकाले जनताको कल्याण गर्ने प्रयास गर्छ। मेरा लागि सबैभन्दा ठूलो धर्म मानवता हो। पछिल्ला केही महिनादेखि जमीनस्तरमा विकासका काम निकै राम्रो ढङ्गले भइरहेको एउटा पार्टीको हिस्सा बन्न पाएकोमा मलाई गर्व छ।”

भाजपामा सामेल हुनु तथा दल परिवर्तनलाई लिएर सामाजिक सञ्जालमा बनिरहेका मिम र तीखो टिप्पणीबारे कोयलले संयमित प्रतिक्रिया दिइन्। मनोविज्ञानकी विद्यार्थी समेत रहेकी कोयलले यस विषयमा भनिन्, “मलाई कसैसँग कुनै गुनासो वा रिस छैन। मेरो व्यक्तिगत धारणा के हो भने अरूलाई होच्याएर वा अपमान गरेर मानसिक शान्ति पाउने मानिसहरूले आफ्नो कुनै आन्तरिक कुण्ठाका कारण यस्तो गर्छन्। यदि उनीहरू आफ्नो जीवनमा खुशी र सन्तुष्ट हुन्थे भने कहिल्यै अरूलाई अपमान गरेर आनन्द लिने थिएनन्। म उनीहरूको राम्रो मानसिक स्वास्थ्यको कामना गर्छु। म कसैका बारेमा नराम्रो बोल्ने छैन। देशको हित र सेवाका लागि काम गर्न सकूँ, त्यसका लागि तपाईहरू सबैको आशीर्वाद चाहन्छु।”

हिन्दुस्थान समाचार / भवानी थामी