गान्तोक, 05 अक्टोबर (हि.स.)। केन्द्रिय शिक्षा तथा पूर्वोत्तर क्षेत्र विकास (डोनर) राज्यमन्त्री डा. सुकान्त मजुमदारले आफ्नो दुईदिने औपचारिक सिक्किम भ्रमणको क्रममा सोमवार हेलेन लेप्चा सिक्किम सरकारी मेडिकल कलेजको भ्रमण गरेका छन्।
उक्त संस्थामा आइपुग्दा केन्द्रिय मन्त्रीलाई भवन तथा आवास विभागका पीसीई तथा सचिव चन्द्रविजय बस्नेत, भवन तथा आवास विभागका पीसीई वाईएन गौतम र सिक्किम सरकारका अन्य वरिष्ठ अधिकारीहरूका साथै हेलेन लेप्चा सिक्किम सरकारी मेडिकल कलेजका प्राध्यापक तथा कर्मचारीहरूले न्यानो स्वागत जनाए।
भ्रमणको क्रममा डा. मजुमदारले मेडिकल कलेज र यसको पूर्वाधारबारे जानकारी लिए। हेलेन लेप्चा सिक्किम सरकारी मेडिकल कलेजका डिन डा. विक्रम खड़काले उनलाई क्याम्पसका सुविधा र विभिन्न विषयबारे जानकारी गराए। त्यसपछि उनले मेडिकल कलेजको पहिलो ब्याचका विद्यार्थीहरूसँग अन्तरक्रिया गरे।
राज्यको पहिलो सरकारी मेडिकल कलेजका रूपमा रहेको हेलेन लेप्चा सिक्किम सरकारी मेडिकल कलेजको उद्घाटन प्रधानमन्त्री नरेन्द्र मोदीद्वारा 28 अप्रेल, 2026 मा भर्चुअल माध्यमबाट गरिएको थियो, जसले सिक्किममा चिकित्सा शिक्षा र स्वास्थ्य सेवा पूर्वाधारको विकासमा एउटा महत्त्वपूर्ण कोसेढुङ्गा स्थापित गरेको छ।
यस क्याम्पसमा मुख्य सुविधाको रूपमा एक विस्तृत शैक्षिक भवन रहेको छ, जसलाई समर्पित आवास तथा आवासीय पूर्वाधारहरूले सहयोग पुर्याएका छन्।
यस संस्थानमा बास्केटबल कोर्ट, भलिबल कोर्ट, जिम्नेजियम र इण्डोर ब्याडमिन्टन कोर्टलगायत खेलकुद तथा मनोरञ्जनका सुविधाहरू पनि उपलब्ध छन्।
डा. सुकान्त मजुमदारको उक्त संस्थाको भ्रमण सिक्किममा रहेको उनको आधिकारिक कार्यक्रमको एक हिस्सा थियो। यस क्रममा उनले पूर्वोत्तर क्षेत्रका लागि प्रधानमन्त्रीको विकास पहल’ (पीएम-डिभाइन) अन्तर्गत परियोजनाहरूका साथै डोनर र राज्य सरकारद्वारा समर्थित परियोजनाहरूको पनि अवलोकन गरे।
---------------
हिन्दुस्थान समाचार / बिशाल
