नयाँ दिल्ली, 0९ अक्टोबर (हि.स.)। दिल्लीमा 10 अक्टोबर मा प्रस्तावित विरोध प्रदर्शनलाई ध्यानमा राख्दै दिल्ली पुलिसले दिल्ली मेट्रो रेल निगम (डीएमआरसी) लाई ५७ वटा मेट्रो स्टेशनका प्रवेश तथा निकासद्वार शुक्रवार राति ९ बजीदेखि बन्द गर्ने तयारी गर्न आग्रह गरेको छ। पुलिसले अवस्था सामान्य नभएसम्म शनिवार पनि उक्त प्रतिबन्ध जारी राख्न अनुरोध गरेको छ। यद्यपि, मेट्रो स्टेशनका द्वार बन्द गर्ने निर्णयबारे अहिलेसम्म औपचारिक घोषणा गरिएको छैन।
पुलिसका संयुक्त आयुक्त (यातायात क्षेत्र) रजनीश गुप्ताले बिहिवार डीएमआरसीका प्रबन्ध निदेशक विकास कुमारलाई पत्र लेख्दै सम्बन्धित स्टेशनहरूमा आवश्यक कदम चाल्न आग्रह गरेका छन्। पत्रमा ती स्टेशन हुँदै सञ्चालन हुने मेट्रो रेलको आवृत्ति घटाउने विषयमा पनि विचार गर्न भनिएको छ।
पुलिस अनुसार, नयाँ दिल्ली जिल्लाको जन्तर-मन्तर लगायत अन्य स्थानमा विरोध प्रदर्शन हुने तथा प्रदर्शनकारीहरूको भीड़ संवेदनशील स्थानतर्फ अघि बढ्नसक्ने आशंकालाई ध्यानमा राख्दै यो सावधानीपूर्ण कदम चाल्न अनुरोध गरिएको हो। मुख्य निर्वाचन आयुक्त ज्ञानेश कुमार विरुद्ध ककरोच जनता पार्टी (सीजेपी) ले विरोध प्रदर्शनको आह्वान गरेको छ।
सम्भावित प्रतिबन्धका लागि सूचीमा समावेश गरिएका ५७ वटा मेट्रो स्टेशनमध्ये जनपथ, पटेल चोक, केन्द्रिय सचिवालय, लोक कल्याण मार्ग, राजीव चोक, नयाँ दिल्ली, सेवा तीर्थ (उद्योग भवन), मण्डी हाउस, बाराखम्बा रोड, आईटीओ, दिल्ली गेट, खान मार्केट, आरके आश्रम मार्ग, झण्डेवालान, सर्वोच्च अदालत, इन्द्रप्रस्थ र शिवाजी स्टेडियम रहेका छन्।
यस बाहेक आईएनए (दुवै मेट्रो मार्गमा), हौज खास, जोरबाग, अर्जनगढ, सराय काले खाँ–निजामुद्दीन, लाजपत नगर, जंगपुरा, आश्रम, कालिन्दी कुञ्ज, जसोला, जामिया मिल्लिया इस्लामिया, ओखला विहार, चावड़ी बजार, जामा मस्जिद, करोल बाग, राजेन्द्र प्लेस र कश्मीरी गेट पनि सूचीमा समावेश छन्।
उत्तर तथा उत्तर-पूर्वी दिल्लीका विश्वविद्यालय, विधानसभा, सिभिल लाइन्स, इन्द्रलोक, जीटीबी नगर, कन्हैया नगर, नेताजी सुभाष प्लेस, आजादपुर, आदर्श नगर, जहाँगीरपुरी, हैदरपुर बादली मोड, मजलिस पार्क, शालीमार बाग, सीलमपुर, मौजपुर, जाफराबाद, वेलकम, यमुना विहार, खजुरी खास, शाहदरा, रिठाला, रोहिणी पूर्व र रोहिणी पश्चिम स्टेशनहरू पनि सूचीमा परेका छन्।
पुलिसले डीएमआरसीलाई सम्बन्धित अधिकारी तथा कर्मचारीहरूका लागि आवश्यक निर्देश जारी गर्न र परिस्थितिअनुसार उचित कदम चाल्न आग्रह गरेको छ। प्रस्तावित व्यवस्थाको उद्देश्य विरोध प्रदर्शनका क्रममा संवेदनशील स्थानहरूमा भीड़को आवागमन नियन्त्रण गर्नु रहेको छ।
हिन्दुस्थान समाचार / भवानी थामी
09 Oct 2026
