- अन्तिम ओभरमा ३३८ रनको लक्ष्य पूरा, मोहित उल्वाले २६ बलमा नटआउट ४९ रन बनाए
अल अमेरात (ओमान), १४ नोभेम्बर (हि.स.)। भारतीय यू-१९ क्रिकेट टोलीले शनिबार रोमाञ्चक फाइनलमा चिरप्रतिद्वन्द्वी पाकिस्तानलाई एक विकेटले पराजित गर्दै २०२६ को एसीसी पुरुष यू-१९ एसिया कपको उपाधि जितेको छ। अल अमेरात क्रिकेट मैदानमा सम्पन्न फाइनल खेलमा भारतले ३३८ रनको विशाल लक्ष्य अन्तिम ओभरमा पूरा गर्दै नौ विकेट गुमाएर ३३९ रन बनायो।
भारतको यस यादगार जितमा मोहित उल्वा र मनल चौहानले महत्त्वपूर्ण भूमिका निर्वाह गरे। दबाउपूर्ण परिस्थितिमा उल्वाले २६ बलमा पाँच चौका र तीन छक्काको मद्दतले अविजित ४९ रन बनाएर टोलीलाई लक्ष्यसम्म पुर्याए। उनलाई चिगुरुपति वेंकटले आठ बलमा अविजित ११ रन बनाएर महत्त्वपूर्ण साथ दिए।
टस जितेर पहिले ब्याटिङ गरेको पाकिस्तानले निर्धारित ५० ओभरमा नौ विकेट गुमाएर ३३७ रन बनाएको थियो। उस्मान खानले उत्कृष्ट ब्याटिङ गर्दै १११ बलमा ११ चौका र तीन छक्काको मद्दतले १०७ रनको शतकीय पारी खेले। अब्दुल कादिरले ५४ बलमा आठ छक्का र तीन चौकासहित ८० रन बनाए।
पाकिस्तानका कप्तान फरहान युसुफले पनि ६० बलमा ६३ रनको योगदान दिए भने अहमद हुसेनले १७ रन बनाए। भारतका तर्फबाट काव्या पटेल सर्वाधिक सफल बलर रहे। उनले ६८ रन खर्चेर चार विकेट लिए। चिगुरुपति वेंकटले तीन विकेट हासिल गरे।
३३८ रनको लक्ष्य पछ्याउन मैदानमा उत्रिएको भारतीय टोलीलाई कप्तान लक्ष्य राजेश रायचन्दानीले स्थिर शुरुआत दिलाए। उनले १०१ बलमा ८० रन बनाए। आर्यवीर सहवागले ६१ बलमा ५८ रनको योगदान दिए। मनल चौहानले ३२ बलमा आक्रामक ४७ रन बनाउँदै भारतको जितको सम्भावना कायम राखे।
तर, नियमित अन्तरालमा विकेट पतन हुँदा भारतीय टोली दबाबमा परेको थियो। यस्तो कठिन परिस्थितिमा मोहित उल्वाले आक्रामक ब्याटिङ गर्दै खेलको दिशा नै परिवर्तन गरे। उनले अविजित ४९ रनको महत्त्वपूर्ण पारी खेल्दै भारतलाई जितको नजिक पुर्याए। चिगुरुपति वेंकटले पनि अन्तिमसम्म उनको साथ दिएपछि भारतले अन्तिम ओभरमा लक्ष्य पूरा गर्दै रोमाञ्चक जित दर्ता गर्यो।
पाकिस्तानका तर्फबाट रिजवानुल्लाहले तीन विकेट लिए भने निकाब शफिकले दुई विकेट हासिल गरे।
यस जितसँगै भारतीय युवा खेलाडीहरूले दबाउपूर्ण फाइनलमा धैर्य, आत्मविश्वास र उत्कृष्ट सङ्घर्षको प्रदर्शन गर्दै महादेशीय उपाधि आफ्नो नाममा गरेका छन्।
हिन्दुस्थान समाचार / बिशाल
