
नयाँ दिल्ली, १८ नोभेम्बर (हि.स.)। भारतीय युवा कांग्रेस (आईवाईसी) ले राहुल गान्धीलाई लक्षित गरी कथित रूपमा आपत्तिजनक तथा कृत्रिम बुद्धिमत्ता (एआई) मार्फत तयार गरिएका भीडियोहरू प्रसारण गरिएको घटनाको निन्दा गरेको छ। संगठनले बुधवार पुडुचेरीमा भाजपा सरकार र गोवामा आम आदमी पार्टी (आप) सँग सम्बन्धित आधिकारिक सामाजिक सञ्जालका माध्यमबाट प्रसारित यी भीडियोहरू तत्काल हटाउन र सार्वजनिक रूपमा माफी माग्न आग्रह गरेको छ।
भारतीय युवा कांग्रेसका राष्ट्रिय अध्यक्ष उदय भानु चिबले राहुल गान्धीलाई लक्षित गरी यस प्रकारका एआई निर्मित सामग्री प्रसारण गर्नु विपक्षी दलहरूको निराशा दर्शाउने विषय भएको बताए। राहुल गान्धीले देशका युवा, किसान, मजदुर, महिला तथा वञ्चित वर्गका मुद्दा उठाइरहेकाले उनलाई निशाना बनाइएको उनले आरोप लगाए।
चिबले आम आदमी पार्टीमाथि चर्को हमला गर्दै प्रविधिको प्रयोग कुनै व्यक्तिको छवि बिगार्ने हतियारका रूपमा गर्न नहुने बताए।
भारतीय युवा कांग्रेसका राष्ट्रिय प्रभारी मनीष शर्माले यो राजनीतिक आलोचना नभई डिजिटल माध्यमबाट तयार पारिएका प्रचार सामग्री मार्फत सार्वजनिक बहसलाई दूषित बनाउने प्रयास भएको बताए। उनले दुवै दललाई बेरोजगारी, महँगी, आर्थिक सङ्कट र भ्रष्टाचार जस्ता मुद्दामा पनि यसैगरी भीडियो बनाएर जवाफ दिन चुनौती दिए।
शर्माले आपत्तिजनक सामग्री तत्काल हटाएर सार्वजनिक रूपमा माफी माग्नुपर्ने बताए। त्यसो नगरिए भारतीय युवा कांग्रेसले लोकतान्त्रिक तथा कानूनी कारबाहीलाई तीव्र बनाउने चेतावनी दिए।
भारतीय युवा कांग्रेसले सम्बन्धित सामाजिक सञ्जाल ह्यान्डलबाट आपत्तिजनक एआई भीडियो हटाउन, दुवै दलका राष्ट्रिय नेतृत्वले सार्वजनिक रूपमा माफी माग्न तथा सामग्री तयार गर्ने र प्रसारण गर्ने जिम्मेवार पदाधिकारी एवं सामाजिक सञ्जाल टोलीको जवाफदेहिता सुनिश्चित गर्न माग गरेको छ। साथै, प्रचलित कानून र सामाजिक सञ्जाल सम्बन्धी नियम उल्लङ्घन गर्ने सामग्री विरुद्ध कड़ा कारबाही गर्न पनि संगठनले माग गरेको छ।
युवा कांग्रेसले राजनीतिक प्रतिस्पर्धा विचार, नीति, जनहितका मुद्दा र लोकतान्त्रिक बहसमा आधारित हुनुपर्ने बताउँदै डिजिटल माध्यमबाट कसैको छवि बिगार्ने कार्यमा आधारित हुन नहुने धारणा व्यक्त गरेको छ।
/ बिशाल