नयाँ दिल्ली, ०३ नोभेम्बर (हि.स.)। भारतीय जनता पार्टी (भाजपा) ले मंगलवार कांग्रेस सहित अन्य विपक्षी दलहरूमाथि देशमा अराजकता फैलाउन खोजेको आरोप लगाएको छ। साथै, राहुल गान्धीका ‘सत्ता परिवर्तन’ सम्बन्धी अभिव्यक्ति तथा कथित हिंसात्मक विरोध प्रदर्शनलाई लिएर पनि भाजपाले प्रश्न उठाएको छ। प्रधानमन्त्री नरेन्द्र मोदीको नेतृत्वमा भारतले विश्व मञ्चमा बलियो भूमिका निर्वाह गरिरहेको बेला विपक्षको एउटा समूहले संवैधानिक व्यवस्था र लोकतान्त्रिक संस्थाहरूलाई चुनौती दिने राजनीति गरिरहेको भाजपाको आरोप छ।

भाजपाका राष्ट्रिय प्रवक्ता गौरव भाटियाले मंगलवार पार्टी मुख्यालयमा आयोजित पत्रकार सम्मेलनमा भारतीय समाजको आस्था संविधान र लोकतान्त्रिक व्यवस्थामाथि रहेको बताए। हिंसात्मक विरोध प्रदर्शन भारतीय लोकतान्त्रिक परम्पराअनुरूप नरहेको उल्लेख गर्दै उनले राहुल गान्धीको नेतृत्वमा विपक्षले लोकतान्त्रिक व्यवस्थालाई प्रभावित पार्न सक्ने राजनीति गरिरहेको आरोप लगाए। यस्तो सोच देशहित र लोकतान्त्रिक मूल्यविपरीत रहेको उनको भनाइ थियो।

भाजपाको ‘लोकतन्त्र बचाऔँ, अराजकता हटाऔँ’ अभियानको उल्लेख गर्दै भाटियाले यस कार्यक्रमको उद्देश्य देशमा अराजकता र हिंसात्मक विरोधको राजनीति विरुद्ध आवाज उठाउनु रहेको बताए। पार्टीका राष्ट्रिय अध्यक्ष नितिन नवीनले पनि यस अभियान अन्तर्गत आयोजित पदयात्रामा सहभागिता जनाएका थिए। केन्द्रिय गृहमन्त्री अमित शाहले समेत ठूलो सङ्ख्यामा सहभागीहरूसँग पदयात्रा निकालेको उनले जानकारी दिए।

आफ्नो वक्तव्यको समर्थनमा प्रवक्ता भाटियाले एउटा टेलिभिजन च्यानलको स्टिङ अपरेशनको उल्लेख गरे। उक्त अपरेशन मार्फत विपक्षसँग सम्बन्धित केही व्यक्तिहरूको पर्दापछाड़ीका गतिविधि तथा कथित रणनीति सार्वजनिक भएको उनको दाबी थियो।

यी खुलासाले विपक्षको राजनीति र वास्तविक उद्देश्यबारे जानकारी दिएको उनले बताए।

उनले उक्त अनुसन्धानबाट केही विषय सार्वजनिक भएको दाबी गर्दै पहिलो, राहुल गान्धीको रोजाइमा विध्वंसात्मक कार्यशैली रहेको र हिंसाप्रति उनलाई कुनै आपत्ति नरहेको आरोप लगाए। दोस्रो, महिलाहरूलाई अगाड़ी सारेर विरोध प्रदर्शन गराउने सोचलाई उनले तल्लोस्तरको र निन्दनीय मानसिकताको संज्ञा दिए।

भाटियाले भारतका विपक्षी दलहरूलाई अहिले अराजकता र योजनाबद्ध गतिविधिमा आधारित कार्यशैली नै बढ़ी मन पर्न थालेको आरोप लगाए। विपक्षी दलहरूले हिंसारहित, सकारात्मक, शान्तिपूर्ण तथा रचनात्मक विरोध प्रदर्शन किन नगरेको भन्दै उनले प्रश्न उठाए। प्रशासनबाट अनुमति लिएर निर्धारित स्थानमा शान्तिपूर्ण रूपमा विरोध प्रदर्शन गर्न सकिने उनको भनाइ थियो।

/ बिशाल