गान्तोक, 07 नोभेम्बर (हि.स.)। सिक्किमका लोकसभा सांसद इन्द्रहाङ सुब्बाले सांसद स्थानीय क्षेत्र विकास योजना (एमपीएलएडी) अन्तर्गत लोअर स्यारी माध्यमिक विद्यालयलाई कम्प्युटरहरू उपलब्ध गराएका छन्। प्रयोगशालाको प्रभावकारी सञ्चालनलाई सहज बनाउन आवश्यक कम्प्युटर टेबल र कुर्सीहरू पनि उपलब्ध गराइएको छ।
विद्यालयको स्वर्ण जयन्ती समारोहको अवसरमा मुख्य अतिथिका रूपमा उपस्थित सांसद सुब्बाले नवनिर्मित कम्प्युटर प्रयोगशालाको औपचारिक उद्घाटन गरे। यसले विद्यालयको डिजिटल शिक्षातर्फको यात्रामा अघि बढ्न तथा विद्यार्थीहरूका लागि शैक्षिक अवसरहरू विस्तार गर्न एउटा महत्त्वपूर्ण उपलब्धि थपेको बताइएको छ।
यस अवसरमा क्षेत्र विधायक तेन्जिङ नर्बु लाम्थाको पनि उपस्थित रहेका थिए। उनी जारी स्वर्ण जयन्ती समारोहका मुख्य संरक्षकसमेत हुन्। सांसदका निजी सचिवद्वारा आज जारी विज्ञप्ति अनुसार, सांसद सुब्बाले सरकारी विद्यालयको शैक्षिक गुणस्तर र पूर्वाधार विकासलाई आफ्नो प्राथमिकतामा राख्दै आएका छन्। विशेषगरी आर्थिक रूपमा कमजोर तथा सामान्य पृष्ठभूमिका परिवारका बालबालिकाले अध्ययन गर्ने सरकारी विद्यालयहरूमा आधुनिक शैक्षिक सुविधा विस्तार गर्न उनले जोड दिँदै आएका छन्।उनको दृष्टिकोणमा बालबालिकाले प्राप्त गर्ने गुणस्तरीय शिक्षा र आधुनिक प्रविधिमा आधारित सिकाइका अवसर आर्थिक अवस्था वा सामाजिक पृष्ठभूमिका आधारमा सीमित हुनुहुँदैन। कम्प्युटर प्रयोगशालाले विद्यार्थीहरूलाई प्रविधिको संसारसँग जोड्दै ज्ञान, आत्मविश्वास र नयाँ सम्भावनाका ढोकाहरू खोल्ने विश्वास व्यक्त गरिएको छ।
हिन्दुस्थान समाचार / बिशाल
