अहमदाबाद, 0९ मार्च (हि.स.)। भारतीय टोलीका कप्तान सूर्यकुमार यादवले आईसीसी पुरुष टी-२० विश्व कप जितेपछि भारतीय क्रिकेट कन्ट्रोल बोर्ड (बीसीसीआई) प्रति आभार व्यक्त गरेका छन्। उनले २०२४ को विश्व कपपछि बोर्डले आफूलाई कप्तानीको जिम्मेवारी दिएर विश्वास देखाएको र त्यही भरोसाका कारण टोलीले यो ठूलो सफलता हासिल गर्न सकेको बताए।

ट्रफी वितरण समारोहका क्रममा सूर्यकुमार यादवले भने, “यो निकै लामो यात्रा रह्यो। २०२४ विश्व कपपछि बीसीसीआई, जय शाह, रोहित शर्मा र सबैले ममाथि भरोसा देखाउँदै यो उत्कृष्ट टोलीको कप्तानी गर्ने अवसर दिए।” उनले पछिल्ला दुई वर्षदेखि टोलीले लगातार राम्रो क्रिकेट खेलिरहेको र त्यही लय कायम राख्नु नै लक्ष्य रहेको बताए।

सेमसन, अभिषेक र वरुणको प्रशंसा

सूर्यकुमार यादवले टोलीको जितमा महत्वपूर्ण भूमिका खेल्ने खेलाडीहरूको पनि खुलेर प्रशंसा गरे। उनले संजु सेमसन, अभिषेक शर्मा र वरुण चक्रवर्तीको प्रदर्शनलाई टोलीको सफलताको प्रमुख कारण बताए।

कप्तानले भने, “यी खेलाडीहरूले के गर्न सक्छन् भन्ने कुरा बुझ्नु धेरै आवश्यक थियो। मलाई थाहा थियो कि उनीहरूमा खेल जिताउने क्षमता छ। संजु टोलीमा आउने समय एकदम सही थियो। वरुण चक्रवर्ती र अभिषेक शर्मा विश्वस्तरीय खेलाडी हुन् र हामीलाई सधैं थाहा थियो कि उनीहरूले केही विशेष गर्न सक्छन्।”

जसप्रीत बुमराह ‘राष्ट्रिय खजाना’

फाइनल खेलमा उत्कृष्ट बलिङ गर्ने जसप्रीत बुमराहको पनि सूर्यकुमार यादवले प्रशंसा गरे। बुमराहले आफ्नो घरेलु मैदानमा ४ विकेट लिएर ‘प्लेयर अफ द म्याच’ पुरस्कार जिते।

सूर्यकुमार यादवले भने, “उनी एक पुस्तामा एकपटक मात्र आउने खालका बलर हुन्। अहिले म उनलाई देशको खजाना भन्न सक्छु। उनलाई के गर्नुपर्छ र कसरी गर्नुपर्छ भन्ने राम्ररी थाहा छ। उनी यो खेलका उत्कृष्ट खेलाडीहरूमध्ये एक हुन्।”

भारतीय कप्तानले टोलीले आगामी दिनहरूमा पनि यस्तै उत्कृष्ट प्रदर्शन गर्दै नयाँ-नयाँ उपलब्धि हासिल गर्ने आशा व्यक्त गरे।

---------------

हिन्दुस्थान समाचार / बिशाल