सन् १९९३ को चर्चित फिल्म खलनायकका लोकप्रिय पात्र ‘बल्लू’ अब फेरि ठूलो पर्दामा फर्किने भएको छ। अभिनेता संजय दत्तले हालै आयोजित एक कार्यक्रममा आफ्नो नयाँ फिल्म खलनायक रिटर्न्सको औपचारिक घोषणा गरेका छन्। यस फिल्मलाई मूल फिल्मको नयाँ रूपका रूपमा प्रस्तुत गरिँदैछ, जसले ९० को दशकमा दर्शकमाझ विशेष पहिचान बनाएको थियो।
सञ्जय दत्तले बताए अनुसार, उनको कम्पनी थ्री डायमेन्शन मोशन पिक्चर्स र अक्षा कम्बोजको एस्पेक्ट इन्टरटेन्मेन्टले फिल्मकार सुभाष घई तथा उनको कम्पनी मुक्ता आर्ट्सबाट फिल्मका अधिकार प्राप्त गरेका छन्। कार्यक्रममा फिल्मको सानो टिजर पनि देखाइएको थियो, जसमा सञ्जय दत्त आफ्नो चर्चित पात्र ‘बल्लू’ को नयाँ र शक्तिशाली अवतारमा देखिएका थिए। यस अवसरमा उनले सुभाष घईलाई फिल्मको विरासतका लागि धन्यवाद पनि व्यक्त गरे।
अभिनेताले खुलासा गरे कि उनलाई यस फिल्मको विचार त्यतिबेला आएको थियो, जब उनी जेलमा सजाय भोगिरहेका थिए। उनले त्यहाँ रहेका कैदीहरूलाई ‘खलनायक’ को पुनरागमन हेर्न चाहन्छन् कि भनेर सोधेका थिए। सञ्जयका अनुसार, हजारौँ कैदीहरूको सकारात्मक प्रतिक्रियाले उनलाई यो कथालाई अघि बढाउन प्रेरित गर्यो। पछि उनले यो विचार सुभाष घईसँग साझा गरे, जसले यसलाई अघि बढाउन समर्थन गरे।
हालसम्म निर्माताहरूले यो स्पष्ट पारेका छैनन् कि ‘खलनायक रिटर्न्स’ मूल फिल्मको सिधा सिक्वेल हुनेछ वा नयाँ रूपान्तरणका रूपमा प्रस्तुत गरिनेछ। फिल्मको कथावस्तु पूर्ण रूपमा गोप्य राखिएको छ। सञ्जय दत्तले यस परियोजनाको रचनात्मक निर्देशनका लागि ज्योति देशपांडेलाई पनि जोडेका छन्। फिल्मको घोषणापछि दर्शकमाझ यसप्रति उत्सुकता उल्लेखनीय रूपमा बढेको छ।
---------------
हिन्दुस्थान समाचार / बिशाल
