वाशिङ्टन, २६ अप्रेल (हि.स.)। राष्ट्रपति डोनाल्ड ट्रम्पले अमेरिकी गणतन्त्रमाथि आक्रमण नयाँ विषय होइन भनी बताएका छन्। यसअघि पनि राष्ट्रलाई रक्तरञ्जित बनाइएको थियो भन्दै उनले नागरिकहरूलाई आपसी मतभेद शान्तिपूर्वक समाधान गर्न आह्वान गरेका छन्।

वाशिङ्टन डीसीमा शनिबार साँझ कडा सुरक्षाबीच भइरहेको व्हाइट हाउस संवाददाता भोजका क्रममा कार्यक्रम स्थल बाहिर भएको गोलीकाण्डबाट पूर्ण रूपमा सुरक्षित रहेका ट्रम्पले घटनाप्रति चिन्ता व्यक्त गर्दै संघीय एजेन्टहरू र कानुन कार्यान्वयन निकायहरूको प्रशंसा गरे।

फक्स न्यूजको रिपोर्टअनुसार, राष्ट्रपति ट्रम्पले घटनाको करिब ३० मिनेटपछि व्हाइट हाउसको ब्रीफिङ‌ रुमबाट आयोजित पत्रकार सम्मेलनमा वार्षिक भोजको आयोजना वाशिङ्टन हिल्टन होटलको बवरुममा गरिएको बताए। यस क्रममा विभिन्न प्रकारका हतियारले सुसज्जित एक व्यक्ति सुरक्षा घेरातर्फ अघि बढेको थियो। एजेन्टहरू र अन्य सुरक्षाकर्मीहरूले संदिग्धलाई अघि बढ्न नदिई नियन्त्रणमा लिए। उनले भने, संदिग्धले एक एजेन्टमाथि निकै नजिकबाट गोली प्रहार गरेको थियो। तर, ती अधिकारीले बुलेटप्रुफ ज्याकेट लगाएको कारण ठूलो दुर्घटना टरेको हो। ती अधिकारी पूर्ण रूपमा सुरक्षित छन्।

व्हाइट हाउसको ब्रीफिङ रुममा आयोजित उक्त पत्रकार सम्मेलनमा सहभागी हुन धेरै पत्रकारहरू सिधै हिल्टन होटलबाट पुगेका थिए। ट्रम्पले सम्मेलनअघि संदिग्धका तस्बिर र भिडियो आफ्नो सामाजिक सञ्जालमा सार्वजनिक गरेका थिए। उनले यस घटनालाई कार्यक्रमको मूल उद्देश्य माथिको प्रत्यक्ष आक्रमण पनि बताएका छन्। उनले भने, “यो कार्यक्रम अभिव्यक्ति स्वतन्त्रताप्रति समर्पित थियो। यसको उद्देश्य दुवै पक्षका सदस्यहरू र सञ्चारकर्मीहरूलाई एउटै स्थानमा ल्याउनु थियो।”

ट्रम्पले यस घटनाबाट सुरक्षा व्यवस्था अझ कडा बनाउन आवश्यक रहेको स्पष्ट भएको बताए। उनले वाशिङ्टन हिल्टन होटल पूर्ण रूपमा सुरक्षित संरचना नभएको टिप्पणी गरे। उनले भने, यसभन्दा राम्रो व्हाइट हाउसको निर्माणाधीन बलरुम हुनेछ, जहाँ ड्रोनप्रुफ सुरक्षा र गोली प्रतिरोधी काँचका पर्खालहरू रहनेछन्।

उनले यस गोलीकाण्डबाट उत्पन्न डरलाई अमेरिकामाथि मडारिरहेका व्यापक खतरासँग पनि जोड्दै भने, “पछिल्ला केही वर्षहरूमा यो पहिलो घटना होइन, जब हाम्रो गणतन्त्रलाई कसैको ज्यान लिने उद्देश्यले आएको व्यक्तिले आक्रमण गरेको हो।” उनले अमेरिकीहरूलाई आग्रह गर्दै भने, “मनदेखि संकल्प लिनुहोस् कि तपाईहरू आपसी मतभेदहरू शान्तिपूर्ण रूपमा समाधान गर्नुहुनेछ।” ट्रम्पले थपे, यो भोज आगामी ३० दिनभित्र फेरि आयोजना गरिनेछ र अझ उत्कृष्ट तथा भव्य हुनेछ।

अधिकारीहरूका अनुसार, संदिग्धको पहिचान ३१ वर्षीय कोल एलनका रूपमा भएको छ। कानुन प्रवर्तन कार्यान्वयन निकायका अनुसार, एलन सम्भवतः वाशिङ्टन हिल्टन होटलमा पाहुनाको रूपमा उपस्थित थिए। यस विषयमा कोलम्बिया जिल्लाकी अमेरिकी सरकारी अधिवक्ता जीनिन पिरोले एलनविरुद्ध पहिले नै धेरै मुद्दाहरू दर्ता भएको र उनी पहिल्यै पनि बन्दुक हिंसामा संलग्न भइसकेको बताइन्। उनीमाथि एक संघीय अधिकारीमाथि आक्रमण गरेको आरोप पनि छ।

यसैबीच पूर्व हाउस स्पीकर न्यान्सी पेलोसीले व्हाइट हाउस संवाददाता भोज बाहिर भएको गोलीकाण्डलाई डरलाग्दो घटना बताउँदै भोजमा उपस्थित राष्ट्रपति, प्रथम महिला तथा अन्य सबै व्यक्तिहरू सुरक्षित रहेकोमा राहत व्यक्त गरेकी छन्।

---------------

हिन्दुस्थान समाचार / भवानी थामी