वाशिङ्टन, 18 मई (हि.स.)। अमेरिकाको उत्तर-पश्चिम क्षेत्रमा रहेको इडाहो राज्यमा आयोजित गनफाइटर स्काइज एयर शो रद्द गरिएको छ। माउन्टेन होम एयर फोर्स बेसमा एयर शोको दोस्रो दिनको कार्यक्रम शुरु हुनुअघि नै दुई अमेरिकी लडाकु विमान आपसमा ठोक्किएका थिए। ठक्करपछि दुवै विमानमा आगलागी भयो र ती पूर्ण रूपमा ध्वस्त भएका थिए। आश्चर्यजनक रूपमा दुवै विमानका चालक दलका चारै सदस्य सुरक्षित रहेका छन्। उनीहरू समयमै सुरक्षित रूपमा बाहिर निस्किन सफल भए।

सीबीएस न्यूज र एनबीसी न्यूजका अनुसार, चालक दलका चारै सदस्यको अवस्था स्थिर रहेको छ र सैन्य अड्डामा उपस्थित कुनै पनि दर्शक वा नागरिक घाइते भएका छैनन्। यो दुर्घटना अमेरिकी स्थानीय समयअनुसार आइतबार दिउँसो करिब १२:३० बजी भएको हो। आकाशमा प्रदर्शन गरिरहेका ती फाइटर जेट अचानक एकआपसमा ठोक्किएर जमिनमा खसेका थिए। खस्नेबित्तिकै दुवै विमानमा आगलागी भएको थियो।

अमेरिकी प्रशान्त बेडाअन्तर्गत नौसेना वायु सेनाकी प्रवक्ता कमाण्डर अमेलिया उमयमले यी विमान अमेरिकी नौसेनाको इलेक्ट्रोनिक अट्याक स्क्वाड्रन १२९ अन्तर्गतका दुई ईए-१८जी ग्रोवलर विमान रहेको जानकारी दिइन्। उनले दुवै विमानका चालक दलका चारै सदस्य सुरक्षित रूपमा बाहिर निस्किएको र दुर्घटनाको अनुसन्धान भइरहेको बताइन्।

कमाण्डर उमयमका अनुसार ईए-१८जी ग्रोवलर विमानहरू वाशिङ्टनस्थित व्हिडबे आइल्यान्डबाट इलेक्ट्रोनिक अट्याक स्क्वाड्रन १२९ मा तैनाथ गरिएको थियो। अमेरिकी नौसेनाका अनुसार, प्रत्येक विमानको मूल्य करिब ६७ मिलियन अमेरिकी डलर रहेको छ।

एयर शो आयोजनासँग सम्बन्धित सिल्भर विंग्स अफ इडाहोकी मार्केटिङ डाइरेक्टर किम साइक्सले सैन्य बेसमा कसैलाई पनि चोटपटक नलागेको र सबै सुरक्षित रहेको बताइन्। उनले यही सबैभन्दा महत्वपूर्ण कुरा भएको उल्लेख गरिन्। सैन्य हवाई अड्डाले सामाजिक सञ्जालमार्फत दुर्घटनापछि तत्काल बेस क्षेत्र सिल गरिएको र एयर शो रद्द गरिएको जानकारी दिएको छ।

आयोजकहरूका अनुसार, यो लोकप्रिय एयर शो उड्डयन इतिहासको उत्सवका रूपमा आयोजना गरिएको थियो, जसमा आधुनिक सैन्य क्षमताको प्रदर्शन गरिन्थ्यो। कार्यक्रममा हवाई प्रदर्शन तथा प्यारासुट जम्प पनि समावेश थिए। अमेरिकी वायु सेनाको फ्लाइट डेमोन्स्ट्रेशन स्क्वाड्रन “थन्डरबर्ड्स” दुवै दिनको मुख्य आकर्षण हुने कार्यक्रम तय गरिएको थियो। माउन्टेन होम पुलिसले एयर शो रद्द गरिएको घोषणा गर्दै सर्वसाधारणलाई बेस वरपर नजान आग्रह गरेको छ।

---------------

हिन्दुस्थान समाचार / भवानी थामी