कोलकाता, 20 मई (हि.स.)। केन्द्रिय अनुसन्धान ब्युरो (सीबीआई) ले पश्चिम बङ्गालका मुख्यमन्त्री सुभेन्दु अधिकारीका निजी सहायक चन्द्रनाथ रथको हत्या प्रकरणमा वाराणसीबाट अर्का एक अभियुक्तलाई पक्राउ गरेर ठुलो सफलता हासिल गरेको छ। चन्द्रनाथ रथको हत्यासम्बन्धी मुद्दामा यो पाँचौँ पक्राउ हो।
अधिकारीहरूका अनुसार, पक्राउ परेका अभियुक्त विनय राय उर्फ पपम रायलाई मङ्गलबार राति हिरासतमा लिइएको थियो। उनी मूल रूपमा गाजीपुर जिल्लाको जमानी क्षेत्रका बासिन्दा हुन्, तर विगत धेरै वर्षदेखि वाराणसीमा बस्दै आएका थिए र सम्पत्ति लेनदेनको काम गरिरहेका थिए।
सीबीआईले अभियुक्तलाई वाराणसीको स्थानीय अदालतमा पेश गऱ्यो, जहाँबाट उनलाई दुई दिनको ट्रान्जिट हिरासत प्राप्त गरेपछि थप सोधपुछका लागि कोलकाता ल्याइएको छ। गुप्त सूचना र प्रमाणका आधारमा अभियुक्तलाई रिजर्भ पुलिस लाइन्स क्षेत्रबाट हिरासतमा लिइएको एक वरिष्ठ पुलिस अधिकारीले बताए।
एजेन्सीले क्यान्टनमेन्ट पुलिस स्टेसनमा मुद्दा दायर गर्ने र मेडिकल जाँचसहित पक्राउसँग सम्बन्धित सबै कानुनी प्रक्रियाहरू पूरा गरेको छ। अभियुक्तलाई पछि अदालतमा पेस गरिएको थियो। यो मुद्दा पश्चिम बङ्गाल पुलिसबाट सीबीआईलाई हस्तान्तरण गरिएको छ। केन्द्रिय एजेन्सीले हत्या र आपराधिक षड्यन्त्र लगायतका विभिन्न धारा अन्तर्गत मुद्दा दर्ता गरेको छ।
यसअघि अभियुक्त मयांक राज मिश्रा र विक्की मौर्य (बक्सर, बिहार) र राज सिंह (बलिया, उत्तर प्रदेश) लाई पक्राउ गरिएको थियो। जाँच एजेन्सीहरूले तिनीहरू सबै सुपारी किलर रहेको बताएको छ। मङ्गलबार सीबीआईले अर्का अभियुक्त राज कुमार सिंहलाई मुजफ्फरनगरबाट पक्राउ गरेको थियो। उनको परिवारले कुनै आपराधिक गतिविधि वा उनको सह-अभियुक्तसँगको सम्बन्धबारे जानकारी नभएको दाबी गरेको छ।
---------------
हिन्दुस्थान समाचार / भवानी थामी
