ओस्लो (नर्वे), २ जून (हि.स.)। नर्वे चेस २०२६ को सातौँ चरण अत्यन्तै रोमाञ्चक रह्यो। यस चरणमा एउटा खेलको निर्णय क्लासिकल चेसमा भयो भने अन्य दुई खेलको निर्णय आर्मागेडन टाइब्रेकरबाट निकालियो।
सोमबार सम्पन्न सातौँ चरणमा दिनको सबैभन्दा ठूलो फेरबदल भारतका युवा ग्रान्डमास्टर आर. प्रज्ञानानन्दले गरे। उनले क्लासिकल खेलमा अलिरजा फिरोजजालाई पराजित गर्दै उपाधि दौडलाई अझ रोमाञ्चक बनाए। लामो समयसम्म चलेको प्रतिस्पर्धात्मक खेलमा प्रज्ञानानन्दले उत्कृष्ट प्रदर्शन गर्दै आफ्नो अग्रतालाई जितमा परिणत गरे। यो प्रतियोगितामा अलिरेजा फिरोजजाको दोस्रो क्लासिकल हार हो।
विश्व नम्बर एक खेलाडी म्याग्नस कार्लसन र भिन्सेन्ट कीमर बीचको क्लासिकल खेल बराबरीमा सकियो। त्यसपछि भएको आर्मागेडन खेलमा कार्लसनले जित हासिल गर्दै अतिरिक्त अंक बटुले र शीर्ष खेलाडीहरूमाथि दबाउ कायम राखे।
त्यसैगरी, वर्तमान विश्व च्याम्पियन डी. गुकेश र वेस्ली सो बीचको क्लासिकल खेल पनि बराबरीमा टुंगियो। आर्मागेडनमा गुकेशले विजय हासिल गर्दै महत्वपूर्ण अतिरिक्त अंक आफ्नो नाममा लेखाए।
सातौँ चरणपछि वेस्ली सो १२.५ अंकसहित तालिकाको शीर्ष स्थानमा कायम छन्। अलिरजा फिरोजजा १० अंकसहित दोस्रो स्थानमा छन् भने म्याग्नस कार्लसन, भिन्सेन्ट काइमर र आर. प्रज्ञानानन्द समान ९-९ अंकसहित उपाधि दौडमा कायम छन्।
महिला वर्गमा बिबिसारा असाउबायेवाको अग्रता थप बलियो, दिव्या देशमुख दोस्रो स्थानमा
नर्वे चेस महिला प्रतियोगितामा बिबिसारा असाउबायेवाले उत्कृष्ट प्रदर्शन गर्दै आफ्नो अग्रता अझ बलियो बनाएकी छन्।
सेता गोटीबाट खेल्दै उनले झु जिनरलाई क्लासिकल खेलमा पराजित गरी पूरा तीन अंक हासिल गरिन्। मध्य खेलदेखि नै अग्रता बनाएकी असाउबायेवाले आत्मविश्वासपूर्ण प्रदर्शन गर्दै जित सुनिश्चित गरिन्।
भारतकी दिव्या देशमुख र कोनेरु हम्पी बीचको क्लासिकल खेल बराबरीमा सकियो। तर आर्मागेडन खेलमा दिव्याले कालो गोटीबाट खेल्दै विजय हासिल गरिन् र अतिरिक्त अंक प्राप्त गरिन्।
अर्को खेलमा वर्तमान महिला विश्व च्याम्पियन जु वेनजुन र अन्ना मुजिचुक बीचको क्लासिकल खेल बराबरीमा समाप्त भयो। त्यसपछि भएको आर्मागेडन खेलमा मुजिचुकले जित हासिल गर्दै महत्वपूर्ण अतिरिक्त अंक आफ्नो खातामा थपिन्।
सातौँ चरणपछि बिबिसारा असाउबायेवा १२.५ अंकसहित पहिलो स्थानमा छिन् भने दिव्या देशमुख १० अंकसहित दोस्रो स्थानमा कायम छिन्। अन्ना मुजिचुक ९.५ अंकसहित तेस्रो स्थानमा छिन्।
हिन्दुस्थान समाचार / बिशाल
