नयाँ दिल्ली, 13 जुलाई (हि.स.)। इन्स्टाग्राममा बाल यौन शोषणसम्बन्धी सामग्रीलाई प्रवर्द्धन गर्ने विज्ञापनबारे भारत सरकारले पठाएको नोटिसको जवाफ मेटाले दिएको छ। अब उक्त जवाफको छानबिन गरी आवश्यक कारबाही गरिने सूचना तथा प्रविधि विभागका सचिव एस. कृष्णनले बताएका छन्।
सोमबार सचिव कृष्णनले पत्रकारहरूसँग कुरा गर्दै इन्स्टाग्राममा बाल यौन शोषणसँग सम्बन्धित सामग्री भएका विज्ञापनबारे सरकारले पठाएको नोटिसको जवाफ मेटाबाट प्राप्त भएको र त्यसको अध्ययन तथा छानबिन भइरहेको जानकारी दिए। उनले छानबिनपछि आवश्यक र उपयुक्त कारबाही गरिने बताए।
केन्द्र सरकारले इन्स्टाग्राममा बाल यौन शोषणसम्बन्धी सामग्रीलाई प्रवर्द्धन गर्ने विज्ञापनहरू देखिएको विषयलाई गम्भीर रूपमा लिँदै मेटालाई कडा नोटिस जारी गरेको थियो। साथै यस्ता विज्ञापनहरू प्लेटफर्ममा कसरी प्रसारण भए भन्नेबारे स्पष्टिकरण पनि मागिएको थियो।
एक सञ्चारमाध्यमको अनुसन्धानात्मक प्रतिवेदनमा इन्स्टाग्राममा “रेप भिडियो” र “चाइल्ड भिडियो” जस्ता शब्द प्रयोग गरी सशुल्क विज्ञापन सञ्चालन गरिएको दाबी गरिएको थियो। प्रतिवेदनअनुसार ती विज्ञापनमार्फत प्रयोगकर्तालाई त्यस्ता टेलिग्राम च्यानलमा पुर्याइन्थ्यो, जहाँ कथित रूपमा बाल यौन शोषणसम्बन्धी सामग्री (सीएसएएम) ९९ भारतीय रुपियाँ जति न्यून मूल्यमा बिक्री भइरहेको थियो।
हिन्दुस्थान समाचार / बिशाल
13 Jul 2026
