सिएटल, 0२ जुलाई (हि.स.)। युरी टिलेमान्सको दुई गोलको मद्दतमा बेल्जियमले फिफा विश्वकप २०२६ अन्तर्गत राउन्ड अफ-३२ को खेलमा बुधबार सेनेगललाई ३-२ ले पराजित गर्दै रोमाञ्चक शैलीमा अन्तिम-१६ (प्रि-क्वार्टरफाइनल) मा स्थान सुरक्षित गरेको छ।
खेलको शुरुआतमा सेनेगलले उत्कृष्ट प्रदर्शन गर्दै हाबिब डियारा र इस्माइला सारको गोलमा २-० को अग्रता बनाएको थियो। एक समय सेनेगल सहज रूपमा अर्को चरणमा पुग्ने अवस्थामा देखिएको थियो।
तर खेलको अन्तिम समयमा बेल्जियमले पुनरागमन गर्यो। ८६औँ मिनेटमा स्थानापन्न खेलाडी रोमेलु लुकाकुले गोल गर्दै अन्तर २-१ मा झारे। त्यसपछि ८९औँ मिनेटमा युरी टिलेमान्सले बराबरी गोल गर्दै खेललाई अतिरिक्त समय (एक्स्ट्रा टाइम) मा पुर्याए।
अतिरिक्त समयको ११७औँ मिनेटमा वीएआरको सहयोगमा बेल्जियमले पेनल्टीको अवसर पायो। रिप्लेमा सेनेगलका लामिन कामाराले पेनल्टी क्षेत्रभित्र टिलेमान्समाथि फाउल गरेको पुष्टि भएपछि रेफ्रीले पेनल्टी दिएका थिए।
पेनल्टी प्रहार गर्न आएका टिलेमान्सले कुनै गल्ती नगरी गोल गरे र ३-२ को स्मरणीय जित दिलाए।
यस जितसँगै बेल्जियमले फिफा विश्वकप २०२६ को अन्तिम-१६ मा स्थान सुरक्षित गरेको छ। अब अन्तिम-१६ मा बेल्जियमको सामना अमेरिकासँग हुनेछ।
हिन्दुस्थान समाचार / बिशाल
