लण्डन, 06 जुलाई (हि.स.)। अष्ट्रेलियाले महिला टी२० विश्वकप २०२६ को फाइनलमा इङ्ग्ल्यान्डलाई ७ विकेटले पराजित गर्दै रेकर्ड सातौँ पटक विश्व च्याम्पियन बन्न सफल भएको छ। लर्ड्स क्रिकेट मैदानमा सम्पन्न उपाधि भिडन्तमा अष्ट्रेलियाले १५१ रनको लक्ष्य १८औँ ओभरमै तीन विकेट गुमाएर पूरा गर्यो।
यो अष्ट्रेलियाको महिला टी२० विश्वकपमा सातौँ उपाधि हो। हालसम्म कुनै पनि अन्य टोलीले यो प्रतियोगिताको उपाधि एकपटकभन्दा बढी जित्न सकेको छैन। अर्कोतर्फ, इङ्ग्ल्यान्डले चौथोपटक महिला टी२० विश्वकपको फाइनलमा हार बेहोरेको छ, र प्रत्येक पटक उसलाई अष्ट्रेलियाले नै पराजित गरेको छ।
टस हारेर पहिले ब्याटिङ गरेको इङ्ग्ल्यान्डको सुरुआत निकै कमजोर रह्यो। टोलीले ३२ रनमै आफ्ना दुवै ओपनर एमी जोन्स (६) र ड्यानी व्याट (८) को विकेट गुमायो। त्यसपछि कप्तान नेट सिभर-ब्रन्ट र एलिस क्याप्सीले तेस्रो विकेटका लागि ३५ रनको साझेदारी गर्दै इनिङ्स सम्हाल्ने प्रयास गरे। क्याप्सी २३ रनमा आउट भइन् भने हीदर नाइट केवल २ रनमै पेभिलियन फर्किइन्।
७० रनमा चार विकेट गुमाएको अवस्थामा कप्तान नेट सिभर-ब्रन्ट र फ्रेया केम्पले उत्कृष्ट ब्याटिङ गर्दै पाँचौँ विकेटका लागि अविजित ८० रनको साझेदारी गरे। सिभर-ब्रन्टले ५३ बलमा ५८ रन तथा फ्रेया केम्पले २८ बलमा अविजित ४४ रन बनाएपछि इङ्ग्ल्यान्डले निर्धारित २० ओभरमा ४ विकेट गुमाएर १५० रन बनायो। अष्ट्रेलियाका किम गार्थ, लुसी ह्यामिल्टन, कप्तान सोफी मोलिनक्स र एनाबेल सदरल्यान्डले समान १-१ विकेट लिए।
१५१ रनको लक्ष्य पछ्याउँदै अष्ट्रेलियाले दोस्रो ओभरमै जर्जिया भोलको विकेट गुमायो। त्यसपछि बेथ मुनी र फोएबी लिचफिल्डले दोस्रो विकेटका लागि १०० रनको उत्कृष्ट साझेदारी गर्दै खेललाई अष्ट्रेलियाको पक्षमा मोडे। लिचफिल्डले ३५ बलमा ४८ रन बनाइन् भने बेथ मुनीले ४९ बलमा शानदार ६४ रनको इनिङ्स खेलिन्।
बेथ मुनी महिला टी२० विश्वकपको फाइनलमा दुई अर्धशतक बनाउने पहिलो खेलाडी बनेकी छन्। अन्त्यमा एलिस पेरी (१३) र एश्ले गार्डनर (३) ले टोलीलाई विजयी लक्ष्यसम्म पुर्याउँदै अष्ट्रेलियालाई रेकर्ड सातौँ पटक विश्व च्याम्पियन बनाए।
हिन्दुस्थान समाचार / बिशाल
06 Jul 2026
