वाशिङ्टन/काठमाडौँ, २८ अगस्त (हि.स.)। नेपालमा आएको विनाशकारी बाढीपछि बेपत्ता भएका व्यक्तिहरूको अवस्थाप्रति अमेरिकी प्रशासनले गम्भीर चिन्ता व्यक्त गरेको छ। वाशिङ्टनले काठमाडौँलाई उद्धार तथा खोजी अभियानमा सहयोग गर्न प्रस्ताव गरेको छ। नेपाल पर्यटन बोर्डका अनुसार, यस जलविपत्तिमा कम्तीमा ६५ अमेरिकी नागरिक बेपत्ता भएका छन्।

नेपाल पुलिसले बुधबार आएको बाढीका कारण १,४०० भन्दा बढी व्यक्ति बेपत्ता भएको जनाएको छ। चीनको सरकारी प्रसारक सीसीटीभीका अनुसार, तिब्बत क्षेत्रमा पनि ५५८ जना बेपत्ता भएका छन्, जसमध्ये २६० जना विदेशी नागरिक रहेका छन्।

सीबीएस न्यूजको रिपोर्टअनुसार, अमेरिकी राष्ट्रपति डोनाल्ड ट्रम्पले बिहीबार ओभल अफिसमा पत्रकारहरूसँग कुरा गर्दै अमेरिकी प्रशासन नेपाल सरकारसँग निरन्तर सम्पर्कमा रहेको बताए। उनले अमेरिकी अधिकारीहरूले नेपाली नेतृत्वसँग संवाद गरी खोज तथा उद्धार अभियानमा सहभागी हुन र आवश्यक सबै प्रकारको सहयोग उपलब्ध गराउन प्रस्ताव गरेको जानकारी दिए।

ट्रम्पले भने, “हाम्रा कति नागरिक बेपत्ता छन् भन्ने यकिन तथ्याङ्क छैन, तर नेपाल पर्यटन बोर्डका अनुसार ६५ अमेरिकी नागरिक सम्पर्कविहीन छन्।”

नेपाल पर्यटन बोर्डका प्रमुख कार्यकारी अधिकृत हिकमत सिंह अय्यरले कम्तीमा ६५ अमेरिकी नागरिक बेपत्ता भएको पुष्टि गर्दै रसुवा जिल्लाको बाढी प्रभावित क्षेत्रबाट २७ विदेशी नागरिकको उद्धार गरिएको बताए। उद्धार गरिएकामध्ये दुई जना अमेरिकी नागरिक (एक पुरुष र एक महिला) रहेका छन्।

अमेरिकी विदेश मन्त्रालयका एक प्रवक्ताका अनुसार, नेपालमा प्रभावित अमेरिकी नागरिकहरूको संख्या करिब ९० पुग्न सक्ने अनुमान गरिएको छ। हालसम्म कुनै पनि अमेरिकी नागरिकको मृत्यु भएको पुष्टि भएको छैन।

विदेश मन्त्रालयले आपतकालीन सहायता आवश्यक पर्ने अमेरिकी नागरिकलाई +1-202-501-4444 मा सम्पर्क गर्न आग्रह गरेको छ। साथै आफ्ना आफन्त वा साथीहरूको अवस्थाबारे चिन्तित परिवारजनलाई टोल-फ्री नम्बर +1-888-407-4747 मा सम्पर्क गर्न अनुरोध गरिएको छ।

नेपालस्थित अमेरिकी दूतावासले बाढीमा ज्यान गुमाउनेहरूका परिवार तथा आफन्तप्रति गहिरो समवेदना व्यक्त गरेको छ। दूतावासले बेपत्ता अमेरिकी नागरिकहरूको खोजीका लागि सक्रिय रूपमा काम गरिरहेको जनाएको छ।

दूतावासले बाढी प्रभावित क्षेत्रमा रहेका अमेरिकी नागरिकलाई सकेसम्म छिटो आफ्ना परिवार, होटल, गाइड वा ट्रेकिङ तथा टुर कम्पनीहरूसँग सम्पर्क गर्न आग्रह गरेको छ। यद्यपि, प्रभावित क्षेत्रमा सञ्चार सेवा अझै गम्भीर रूपमा अवरुद्ध रहेको दूतावासले जनाएको छ।

अमेरिकी विदेश मन्त्रालयले परिस्थितिलाई नजिकबाट अनुगमन गरिरहेको बताउँदै राहत तथा समन्वय कार्यमा सहयोग पुर्‍याउन एक सल्लाहकार नेपाल पठाइने जनाएको छ। साथै मानवीय सहायता स्वरूप क्याथोलिक रिलिफ सर्भिसेजलाई ५ लाख अमेरिकी डलर अनुदान उपलब्ध गराइने घोषणा गरिएको छ।

भारतीय आध्यात्मिक गुरु सद्गुरु जग्गी वासुदेवको ईशा फाउन्डेसनसँग आबद्ध लेस्ली क्रेस्पीले यस विपत्तिमा संस्थासँग सम्बन्धित ८० जना व्यक्ति बेपत्ता भएको जानकारी दिइन्। ती सबै कैलाश मानसरोवर तीर्थयात्रामा सहभागी भएका थिए।

क्रेस्पीका अनुसार, बेपत्ता ८० जना १९ विभिन्न देशका नागरिक हुन्, जसमध्ये २२ जना अमेरिकी नागरिक रहेका छन्। उनले करिब १,००० जनाले उक्त तीर्थयात्रामा सहभागिता जनाएको बताइन्।

अमेरिकी नागरिक दीपक डन्डूले आफ्नी पत्नी श्रीदेवी वेजेला पनि नेपालमा बेपत्ता भएकामध्ये एक रहेको बताएका छन्। उनले ईशा फाउन्डेसनको टोलीसँग तिब्बतमा कैलाश पर्वतको तीर्थयात्रा पूरा गरी चीनबाट नेपाल प्रवेश गर्ने क्रममा बाढीमा परेकी थिइन्।

हिन्दुस्थान समाचार / बिशाल