सोरेङ, 10 सेप्टेम्बर (हि.स.)। सोरेङ जिल्ला पुलिसले बिहीबार जिल्ला प्रशासनिक केन्द्र (डीएसी) मा सचेतना कार्यक्रम आयोजना गरी अधिकारीहरूलाई साइबर अपराध तथा यसको रोकथामका उपायबारे जानकारी गराएको छ।
कार्यक्रममा सोरेङका अतिरिक्त पुलिस अधीक्षक पार्शुराम शर्माले साइबर अपराधका विभिन्न पक्षबारे जानकारी गराउँदै साइबर अपराध शिक्षित तथा अशिक्षित दुवै वर्गका व्यक्तिलाई प्रभावित गर्न सक्ने बताए। डिजिटल माध्यम प्रयोग गर्दा सतर्कता तथा विवेक अपनाउनुपर्नेमा उनले जोड दिए।
उनले ‘डिजिटल पक्राउ’ लगायत पछिल्लो समय देखिएका विभिन्न प्रकारका साइबर ठगीबारे जानकारी गराउँदै साइबर अपराधको घटनामा तत्काल शिकायत गर्नुपर्ने बताए। उनले राष्ट्रिय साइबर अपराध हेल्पलाइन १९३० तथा राष्ट्रिय साइबर अपराध रिपोर्टिङ पोर्टल cybercrime.gov.in मार्फत शिकायत गर्न सकिने जानकारी दिए।
सोरेङका एसडीपीओ छेवाङ दोर्जे भोटियाले अनलाइन जबर्जस्ती असुली, चन्दा ठगी, छात्रवृत्ति ठगी तथा अनलाइन खेलसम्बन्धी ठगीलगायत साइबर अपराधका विभिन्न स्वरूपबारे जानकारी गराए। उनले आपत्कालीन सहायता प्रणालीअन्तर्गत ११२ नम्बरको महत्वबारे पनि प्रकाश पारे।
यस क्रममा उनले बालबालिकालाई यौन अपराधबाट संरक्षणसम्बन्धी ऐन तथा २०१२ का सम्बन्धित नियमका प्रावधानबारे पनि अधिकारीहरूलाई जानकारी गराए। उनले साइबर अपराध रोकथामसम्बन्धी सचेतना सन्देश आफ्ना छिमेकी तथा समुदायसम्म पुर्याउन अधिकारीहरूलाई आग्रह गरे।
कार्यक्रमको अन्त्यमा सहभागीबीच अन्तरक्रियात्मक छलफल गरिएको थियो। छलफलका क्रममा सहभागीहरूले आफ्ना अनुभव साझा गर्दै साइबर सुरक्षा तथा अपराध रोकथामका उपायबारे विचार आदानप्रदान गरेका थिए।
हिन्दुस्थान समाचार / बिशाल
